Read wanga TSITSABULI 90 Bible Online

TSITSABULI 90 - wanga bible

TSITSABULI 90

¹Iwe OMWAMI Nyasaye, buli lwosi obetsanga eshimenyo shiefwe, mutsinzibulo tsiefwe tsiosi.

²Noshili okhulonga ebikulu kata eshialo, iwe Nyasaye walinjiho obushia nobushia, khandi olatsiililila okhubaho inziayo.

³Okholanga omundu okhukalukha khu eshiayarulakhwo, nomukalusia khulufu lwa yalongwakhwo.

⁴Emiyika eshikhumila shilala khwiwe chili shinga inyanga ndala butswa, chili butswa shinga inyanga yomukolooba eyimalile okhubira, khandi eshise eshimbichiti shiomushilo.

⁵Iwe okhweyanga nokhuyila shiomukhula, khwibililungwa bwangu shiamalooro keshilo, khuli shinga obunyasi obusebukha mutsuli,

⁶mumabwibwi busebukha nibutendeema, ne khukolooba buniala nibufwa.

⁷Ifwe khusasibungwa nelirumalio, khandi khumululungwa noburumabwo.

⁸Oretsanga obwonooni bwefwe imbeliwo, obwonooni bwefwe obukholwa mumasiliisi oburetsanga habulafu.

⁹Lirumalio limbichitinjia tsinyanga tsiobulamu bwefwe, emiyika chiobulamu bwefwe chibiranga bwangu shinga okhwishia emiuya.

¹⁰Emiyika chiobulamu bwefwe nemiyika amakhumi musafu, noho amakhumi munane khu abamaani. Ne kata kario chiosi nechiamanyakhano nende eshibeela, obulamu buhwaho bwangu, nefu khubira bubira.

¹¹Niwiina owamanya obunyali bwelirumalio? Niwiina owamanya amarisia kelirumalio linyala okhureera?

¹²Kho khwechesiekhwo obwimbichiti bwobulamu bwefwe, kho mbu khubekhwo nomwoyo kwobumanyilisi.

¹³Iwe OMWAMI Nyasaye, oburumabwo bulabaho okhuula liina? Khutiliilwe eshisa, ifwe abakhalabanibo.

¹⁴Okhwikusie buli mumabwibwi nobuheelibwo oburalilu, kho mbu khwikhoye nikhutsaatsahala tsinyanga tsiobulamu bwefwe tsiosi.

¹⁵Bulano khutsaatsahasie tsinyanga tsihelana netsinyanga tsiawakhusandia, okhusaangaasie emiyika echihelana nemiyika chia wakhusandia.

¹⁶Oleshe ifwe abakhalabanibo khulole ebikholebio biamakana, nabo abolwibulo lwefwe balole amaani koluyalilwo.

¹⁷Lekha tsikhabitsio iwe OMWAMI Nyasaye wefwe, tsibe ninefwe, okhunyalile mukoosi akakhukhola.