Read wanga TSITSABULI 92 Bible Online

TSITSABULI 92 - wanga bible

TSITSABULI 92

¹Nobulayi muno okhukhupila OMWAMI Nyasaye orio, nende okhwimba nikhukhwitsoomia iwe Nyasaye Omukhongo Muno.

²Nobulayi okhurumbula obuheelibwo oburalilu buli lwosi mumabwibwi, nende obwisiikwabwo buli eshilo.

³Nobulayi okhukhwitsoomia nobukhana bwelichiengi, nende amayoosi amalayi kelitungu.

⁴Okhuba ebikholebio biamakana iwe OMWAMI Nyasaye binjamisinjia muno, ndimbanga nindikhoya khulwa amalayi koosi akawakhola.

⁵Ebikholebio nebikhongo muno, iwe OMWAMI Nyasaye, nako amapaaroko nakomukari muno.

⁶Kano namakhuwa akomundu omuyingwa alanyala okhumanya ta, kata omusilu shianyala okhumanya eshisina shiako tawe.

⁷Kata abamayanu nibaba nibasebukha shinga obunyasi, nabo abakholi bobumayanu nibakasa, boosi balamululwa inziayo.

⁸Nebutswa iwe OMWAMI Nyasaye oli ikulu muno inziayo.

⁹Khumanyile mbu abasukubo balafwa, ne abamayanu boosi balahulwa.

¹⁰Nebutswa isie ukholile okhuba owamaani shinga imbongo, khandi umbelesiye tsikhabi tsiokhwikhoya.

¹¹Emalile okhulola abasuku banje nibahulwa, nende okhuhulila tsimbungu tsiabakholi bobumayanu.

¹²Abalunjishi batendema shinga emisaala chiamashindu, khandi bakhula nibarambiya shinga emisiita chia Lebanoni.

¹³Bali shinga emisaala chiarakwa munzu eya OMWAMI Nyasaye, echitendema muhekalu ya Nyasaye wefwe.

¹⁴Chishiama ebiamo mubukofu bwachio, khandi buli lwosi chishili emibisi khandi echiamaani.

¹⁵Kano kamanyinjia mbu, OMWAMI Nyasaye nomukololofu khandi obushiamu shibulikhwo mumulindi wanje tawe.