Read wanga TSITSABULI 94 Bible Online

TSITSABULI 94 - wanga bible

TSITSABULI 94

¹Iwe OMWAMI Nyasaye, niwe ouhaananga eshinyasio, niwe Nyasaye omwene shikwoli, lolesia lirumalio.

²Niwe oukhalachilanga abandu boosi eshiina, buukha ohelesie abeisunga akabakhoyeele okhuhebwa.

³Iwe OMWAMI Nyasaye, abakholi bobumayanu balekhoya okhuula liina? Baleyitsiala okhuula liina?

⁴Bafutsululanga amakhuwa kabwe kobusilu, nibelola khulwa obumayanu bwabwe.

⁵OMWAMI Nyasaye, batubulanga abandubo, nibasandia abobulaamebwo.

⁶Beranga abakhasi abalekhwa abarende, nende ababisandu.

⁷Baboola bari, “OMWAMI Nyasaye shialolanga ta, Nyasaye wabandu ba Isiraeli benamilanga shiamanyilisinjia tawe.”

⁸Recheresie inywe abayingwa mubandu, inywe ababula obuchesi mulichesihala liina?

⁹Toto owalonga amarwi kefwe, shiahulilanga ta? Owalonga tsimoni tsiefwe, shialolanga ta?

¹⁰Oukondeshelanga amahanga shialakukuma ta? Owechesinjia abandu, shiali nobumanyi ta?

¹¹OMWAMI Nyasaye amanyile shinga olwa amapaaro kabandu, kali butswa akobusilu.

¹²OMWAMI Nyasaye, noweikhabi omundu owawechesia, owawechesia amalakoko.

¹³Omuhulusinjia mutsinyanga tsiamatinyu, okhuula olwa obuko bwokhuyabilamwo abamayanu buba nibuyabilwe.

¹⁴Okhuba OMWAMI Nyasaye shialafuuba abandube, kata okhulekha abobulaamebwe tawe.

¹⁵Obuyasi bwahabwene bulakalushila abalunjishi, nabo abemioyo emikololofu balabunyoola.

¹⁶Niwiina oubuukha okhukhoonya okhuyinga abamayanu? Niwiina ousinjila okhukhoonya okhuyinga abonooni.

¹⁷OMWAMI Nyasaye aba mbu shiyayakhoonya ta, ndakhafwiile bwangu.

¹⁸Olwa ndapaara mbu, eshilenje shianje shirerekha, obuheeli oburalilu obwa OMWAMI Nyasaye bwandiila.

¹⁹Olwa embetsanga namahendo amanji mumwoyo, iwe OMWAMI Nyasaye uleminjia omwoyo niusaangaasia.

²⁰Iwe shiosanganga halala nabayasi abamayanu, abakasinjia amalako kokhukoboshela abamayanu tawe.

²¹Bekhung'asinjia halala okhuyinga abalunjishi, nende okhukhalachila ababula eshikha eshiina shiokhufwa.

²²Nebutswa iwe OMWAMI Nyasaye niwe olukoba lwanje, niwe olwanda lwanje lwobwilushilo.

²³Alabahelesia eshinyasio khulwa obumayanu bwabwe, nende okhubasasia khulwa obwonooni bwabwe. OMWAMI Nyasaye, Nyasaye wefwe alabamulula.