Read wanga TSINJELO 1 Bible Online

TSINJELO 1 - wanga bible

TSINJELO 1

¹Tsino nitsio tsinjelo tsia Solomoni omusiani wa Daudi, khandi owali omuruchi wa Isiraeli.

²Tsinjelo tsino netsiokhwechesia abandu obuchesi nende obuchetsiyi, nende okhumanyilisia eshisina shiomukari shiamakhuwa.

³Khandi netsiokhwechesia abandu okhuba nobuchesi, obulunjishi nende okhukhola aka habwene.

⁴Tsikholanga omundu oubula obuchesi okhuba omuchesi, khandi tsiechesinjia ababuukha okhuba nobumanyi nende obumanyilisi.

⁵Owobuchesi ahulile mana yemeete obumanyilisi, naye owokhumanyilisia anyoole obusitsa,

⁶obwokhumanyilisia tsinjelo nende ebisina biatsio biomukari, nende okhumanyilisia amakhuwa akabachesi nende eminee chiabwe.

⁷Okhuhelesia OMWAMI Nyasaye oluyali, nibwo obuchaachilo bwokhuba nobumanyi, nebutswa abayingwa bachayanga obuchesi nende obuchetsiyi.

⁸Mwana wanje, rechelesia amebaalo ka papawo, khandi olaloba okhuhulila amechesio ka mamawo tawe.

⁹Okhuba amechesio ako kalaba shinga olusimbi lwolukoosi khumurwekwo, khandi shinga ebiuma ebilayi mwikosilio.

¹⁰Mwana wanje abonooni nibakhuhombelesia, shiolafuchilila amakhuwa kabwe tawe.

¹¹Nibaba nibakhuboolela bari, “Chenda khutsie ninawe, khukoneshele khwiire omundu; noho mbu, chenda khuseere omundu oubula eshikha khulwokhwisangasia abeene.

¹²Noho mbu, chenda khubayile emakombe nibashili ho mwoyo, babe butswa shinga abo abekhanga mubwina.

¹³Khulanyoola emiandu chiosi echiobukusi obukhongo, mana khwitsusie tsinzu tsiefwe nende ebiyayilwe!

¹⁴Yitsa obe ninefwe, ne fwesi khulakabana ninawe ebindu biakhwibile.”

¹⁵Mwana wanje, shiolachendakhwo nabandu shinga abo tawe. Wihaanye okhurula khubo.

¹⁶Okhuba belushilanga okhukhola amabi, khandi batetekhananga okhuraatsia eshitsayi.

¹⁷Okhuba oureka eshireko linyonyi nililolanga, akholanga butswa amakhaya.

¹⁸Abonooni abo bekoneshelanga okhwiyira abeene, barekanga omureko kwokhubatila abeene.

¹⁹Obwo nibwo obumalilishi bwabanuuli, obunuuli busasinjia obulamu bwabwe.

²⁰Obuchesi bulanjilisia nomwoyo omukhongo khumuhanda, buchinguula omwoyo mulwanyi.

²¹Bulanjilisia obutinyu habundu aha abandu bakhung'anilanga, nende mubilibwa ebinjila mwitookho nibuboola buri:

²²“Inywe abandu abayingwa, mulatsiililila okhuba abayingwa okhuula liina? Mulatsiililila okhukokonyela obumanyi okhuula liina? Inywe abayingwa mulatsiililila okhusila obuchesi okhuula liina?

²³Murecheresie okhuhalaba khwanje; Ndalamuboolela akali mumwoyo kwanje, ndalamumanyia amakhuwa kanje.

²⁴Okhuba emulanjile, nenywe nimuloba okhuhulila, emukololosiliye omukhono kwanje nenywe nimuloba okhuhulila.

²⁵Ne khulwa okhubeela mulobile amebaalo kanje koosi, khandi mukhayile okhuhulila okhuhalaba khwanje,

²⁶siesi khandi ndalamutseshelela olwa amasila kamukwila. Ndalamutseshelela olwa amarisia kamwitsila.

²⁷Ndalamutseshelela olwa amarisia kamwitsila shinga imbumbuyeka, khandi amasila kamwitsila shinga eshimbalukusi, olwa amanyakhano nende amatinyu bimwitsila.

²⁸Mana muliihabila, nebutswa shindilimukalusia ta, mulikhaba nomwoyo kwosi, nebutswa shimulinyoola ta.

²⁹Khulwa okhuba mwasila obumanyi, ne khandi nimuloba okhuria OMWAMI Nyasaye,

³⁰mwaloba amebaalo kanje, khandi nimuchaaya okhuhalaba khwanje,

³¹khulweshio mulalia ebiamo biinjenda yenywe abeene, khandi mulatilwa nemireko chienywe abeene.

³²Okhuba abamayanu beyiranga khulwa obumayanu bwabwe abeene, nabo abayingwa besishinjia khulwa obuyingwa bwabwe abeene.

³³Nebutswa abo abarecheresinjia balamenya eshisiche mulembe, khandi balamenya mumulembe, nibalariakhwo amatinyu koosi tawe.”