Read wanga TSINJELO 10 Bible Online

TSINJELO 10 - wanga bible

TSINJELO 10

¹Tsino nitsio tsinjelo tsiomuruchi Solomoni: Omwana omuchesi asangasinjia samwana, nebutswa omwana omuyingwa abeelesinjia nyinamwana.

²Obuyinda obunyoolelwa munjila yobushiamu bubula inganga. Nebutswa obulunjishi buhonokosinjia omundu okhurula mukhufwa.

³OMWAMI Nyasaye shialalekhanga omundu omulunjishi inzala tawe, nebutswa yekalilanga abamayanu okhunyoola ebiabekombanga.

⁴Obukara bureeranga obumanani, nebutswa okhukhola emilimo neshinani, khureeranga obuyinda.

⁵Omwana ouchesa mushimiyu nomuchesi, nebutswa omwana oukoniachila mutsinyanga tsielichesa neshifimbwa murwe.

⁶Omulunjishi anyoolanga tsikhabi, nebutswa omunwa kwomumayanu kwafisa induli.

⁷Abalunjishi baletsulilwa buli lwosi okhuba abandu abali abeikhabi, nebutswa abamayanu bebililungwa bwangu.

⁸Omuchesi mumwoyo, atiilanga amalako, nebutswa omuyingwa owokhwirobotsa alasasikha.

⁹Ouchenda mutsinjila tsiobukolofu amenyanga mumulembe, nebutswa abashiamu mutsinjila tsiabwe batiilikhanga.

¹⁰Omundu oufiinya imoni, areeranga amatinyu, nebutswa oyo oukondeshela habulafu akasinjia omulembe.

¹¹Omunwa kwomulunjishi neshinoko shiobulamu, nebutswa omunwa kwomumayanu kufisanga induli.

¹²Isila yibusinjia obusoolo, nebutswa obuheeli bufunikhanga obubi bwosi.

¹³Omunwa kwomundu wobumanyilisi kuli nobuchesi, nebutswa indabushi yiliho khulwa omukongo kwomuyingwa.

¹⁴Abachesi babikhanga obumanyi, nebutswa okhwirobotsa khwomuyingwa khureeranga obusasishi bwangu.

¹⁵Emindu chiabayinda nichio olukoba lwabwe, nebutswa obumanani bwabamanani nibwo obusasishi bwabwe.

¹⁶Omurungo kwomundu omulunjishi nobulamu, nebutswa omurungo kwomundu omwonooni neshinyasio.

¹⁷Omundu yesi oufuchililanga okhuchelelwa ali khunjila yobulamu, nebutswa oukhayanga okhuhalabilwa akoranga.

¹⁸Omundu yesi ousila owashie mumasilisi nomukaati, naye ouchikha owashie nomuyingwa.

¹⁹Aha amakhuwa amanji kaboolwa, amabi shikachweyangaho tawe, nebutswa owileshesia okhuboola nomuchesi.

²⁰Olulimi lwomundu omulunjishi luli shinga ifetsa inzeleleshe, nebutswa amachesi komundu omumayaanu kabula obukhoonyi.

²¹Amakhuwa komundu omulunjishi kakhoonya abandu abanji, nebutswa abayingwa bafwitsanga khulwa okhubula obumanyilisi.

²²Ikhabi eya OMWAMI Nyasaye yireeranga obuyinda, ne shiameetangakhwo amatinyu tawe.

²³Khumuyingwa, okhukhola amabi khuli shinga omubayo, nebutswa abandu abachesi basangalilanga obuchesi.

²⁴Eshia abamayaanu baria nishio eshilabakwila, nebutswa eshiabalunjishi bekomba nishio eshia balahebwa.

²⁵Olwa imbumbuyeka yihutsa, abamayaanu bakhamuukha, nebutswa abalunjishi baralisibwa inziayo.

²⁶Shinga idivai yiranyile olwa yisalisinjia ameeno, noho omwosi olwa kutsinzininjia tsimoni, nolwa omukara ali khu owamuhandika emilimo.

²⁷Okhuria OMWAMI Nyasaye khwinjiiyinjia tsinyanga tsiobulamu, nebutswa emiyika chiabamayanu chilembichitibwa.

²⁸Obunaayi bwabandu abalunjishi buhwelanga mumwikhoyo, nebutswa obunaayi bwabamayaanu buhwelanga mukhusikha.

²⁹OMWAMI Nyasaye nolukoba lwabalunjishi, nebutswa asishinjia abakholanga obumayaanu.

³⁰Abalunjishi shibalirusibwakhwoho ta, nebutswa abamayaanu shibalisikalakhwoho mushialo tawe.

³¹Omunwa kwomulunjishi kuboolanga akobuchesi, nebutswa olulimi lwomubeeyi lulaholelesibwa.

³²Olulimi lwomulunjishi lumanyanga aka kwanile okhuboolwa, nebutswa omunwa kwomumayanu kuboolanga akobubeeyi.