Read wanga TSINJELO 11 Bible Online

TSINJELO 11 - wanga bible

TSINJELO 11

¹Eshichelo shiobubeeyi neshisinyo khu OMWAMI Nyasaye, nebutswa eshichelo eshiahabwene shimuchamisinjia.

²Okhwichinjimisia khwitsanga nende eshifimbwa murwe, nebutswa obuchesi buli khu abetuutuyia.

³Eshilongoole shimililanga abalunjishi, nebutswa obushiamu bwabakhobi bubamulula abeene.

⁴Obuyinda bubula inganga khunyanga yobumululwi, nebutswa obulunjishi buhonokosia omundu okhurula mukhufwa.

⁵Obulunjishi bwabesiikwa bulunjisinjia tsinjila tsiabwe, nebutswa abamayanu bakwitsanga khulwa obumayanu bwabwe abeene.

⁶Obulunjishi bwabesiikwa bubahoninjia okhurula mumatinyu, nebutswa abakhobi batilungwa nende akabarechekha abeene.

⁷Abamayanu nibafwa obunaayi bwabwe bwosi busikhanga burio, ne obunaayi bwa abalamuritsanga Nyasaye ta, busishilanga mushikhaya.

⁸Abalunjishi bahonokosibungwa okhurula mumatinyu, ne abamayanu nibakwa mumatinyu ako.

⁹Abandu abalaritsanga Nyasaye ta, bamululanga abashiabwe khulwa amakhuwa kabwe, nebutswa abalunjishi bahonokosibungwa khulwa obumanyi bwabwe.

¹⁰Abalunjishi nibanyoola tsikhabi litookho liikhoyanga, ne abamayanu nibamululwa abandu bakhupanga tsingalakala.

¹¹Litookho liralilanga khulwa tsikhabi tsiabalunjishi, nebutswa lisasibungwa namakhuwa akabamayanu.

¹²Omundu oulechelesinjia owashie abula obuchesi, nebutswa omundu ouli nobumanyilisi aholelanga butswa tsi.

¹³Omundu omuyeyemi abuulanga akamasiliisi, nebutswa omusuubilwa mumwoyo abikhanga akamasiliisi.

¹⁴Aha amebaalo kabula, abandu basasikhanga, nebutswa aha abebaali abanji bali omulembe kubetsangaho.

¹⁵Ousinjililanga omurende okhurunga likofi yeretsanga mumatinyu, nebutswa oyo ouloba okhumusinjilila ali mumulembe.

¹⁶Omukhaye wolukoosi ahebungwa oluyali, nebutswa omukhasi omuyingwa neshifimbwa murwe, omusaatsa omukara shialanyoolakhwo amapesa tawe, naye omusaatsa owamahababa alanyoola obuyinda.

¹⁷Abetsimbabasi benyoolelanga abeene amalayi, nebutswa ababula tsimbabasi besalisinjia abeene.

¹⁸Inganga yabamayanu banyoolanga neyobubeeyi, nebutswa abakholanga akobulunjishi banyoolanga inganga ya habwene.

¹⁹Omundu ouralila mubulunjishi alamenya, nebutswa oyo oulondachilila obumayanu alafwa.

²⁰Abandu bemioyo emishiamu nabeshisinyo khu OMWAMI Nyasaye, nebutswa abetsinjila tsingololofu bamuchamisinjia.

²¹Toto bwene abamayanu shibalachweya okhuhelesibwa eshinyasio ta, nebutswa abalunjishi balahonokosibwa.

²²Omukhasi owelikondo lilayi nebutswa oubula obuchesi, ali shinga ingaka yeitsahabu eyireerwe mumoolu keimbitsi.

²³Akomulunjishi yekomba kabetsanga amalayi, nebutswa komumayanu anayanga nakamasila.

²⁴Abahaani bameetanga okhuba abayinda nebutswa abemani bameetanga okhuba abamanani.

²⁵Omuhaani alatsilila okhuyindihala, naye ounywesia owashie amaatsi alanywesibwa amaatsi.

²⁶Abandu balaamanga omundu oufisanga ebiokhulia eshilaamo shiobubi, nebutswa balaamilanga oyo oubira habulafu nabikusia tsikhabi.

²⁷Omundu ourunilisia amalayi anyoolanga oluyali, nebutswa obubi bwitsanga khu oyo oubukhaba.

²⁸Abo abesiikanga obuyinda bwabwe balaniala, nebutswa abalunjishi balatendema shinga lisafu elinera.

²⁹Abareera amatinyu khubetsinzu tsiabwe, omukabo kwabwe nomuyeka, nabo abayingwa balabetsanga abakhalabani babachesi.

³⁰Obulunjishi[1] bureranga obulamu, nebutswa induli[2] yibuyininjiaho.

³¹Abalunjishi nibaba nibarungungwa amalayi khushialo, kho toto bwene abamayanu nende abonooni bakhanyoole eshinyasio.