Read wanga TSINJELO 12 Bible Online

TSINJELO 12 - wanga bible

TSINJELO 12

¹Omundu owaheela okhuchelelwa, yaheela obumanyi, nebutswa owasira okhuhalabilwa neshiyingwa.

²Abandu abalayi banyoolanga tsikhabi okhurula khu OMWAMI Nyasaye, nebutswa abo abarechekhanga amabi abahelesinjia eshinyasio.

³Abulaho ouralilanga khulwa okhukhola obumayanu, nebutswa omulunjishi shialasikulwa tawe.

⁴Omukhaye omulayi nolusimbi lwomusaatsawe, nebutswa omukhasi oufimbinjia omusaatsawe omurwe ali shinga likonzo liomumakumba.

⁵Amapaaro komundu omulunjishi kabetsanga habwene, nebutswa amebaalo akomumayanu nakobubeeyi.

⁶Amakhuwa komundu omumayanu kachoomanga khukhuratsia eshitsayi, nebutswa amakhuwa akomulunjishi kahoninjia.

⁷Abamayanu basasilibungwa elala, nebutswa abomunzu yabalunjishi balatsiililila okhubaho.

⁸Omundu yetsoomibungwa khulwa obuchesibwe, nebutswa omuyingwa achaayungwa.

⁹Nobulayi omwituutuyi, owinyalila, okhushila omwichinjimisi, oubula eshiokhulia.

¹⁰Omundu omulunjishi ahendelenga emirukochie, nebutswa tsimbabasi tsiomumayanu nobululu khuchio.

¹¹Omulimi oukholanga emilimo neshinani, abetsanga nebiokhulia ebinji, nebutswa oyo ouloondachilanga amakhuwa kabutswa abula amachesi.

¹²Abamayanu bekombanga inganga eyirulana mubumayanu, nebutswa eshisina eshiomulunjishi shiamanga ebiamo.

¹³Omundu omumayanu atiilungwa nokhuboolakhwe okhumayaanu, nebutswa omulunjishi ahonokokhanga okhurula mumatinyu.

¹⁴Omundu anyalilungwa okhulondana namakhuwa akaboola, shinga butswa olwa anyoolanga omurungo okurula mumilimo chiamakhonoke.

¹⁵Abayingwa balolanga tsinjila tsiabwe okhuba etsia habwene, nebutswa abachesi barecheresinjia amebaalo.

¹⁶Abayingwa basinyikhanga bwangu, nebutswa abachesi shibatebaanga amanyeko tawe.

¹⁷Omundu ouboolanga obwatoto, aboolanga obuloli bwahabwene, nebutswa omuloli omubeeyi aboolanga akobukaati.

¹⁸Amakhuwa akarumukha okhuboolwa kasalisinjia shinga olukanga, nebutswa amakhuwa akomuchesi kahoninjia.

¹⁹Amakhuwa akatoto kamenyangaho inziayo, nebutswa obubeeyi bubetsangaho butswa hatiiti.

²⁰Obukati buli mumioyo echia abo abarechekhanga amabi nebutswa abo abakasinjia omulembe bali nomwikhoyo.

²¹Abalunjishi shibanyoolanga amatinyu ta, nebutswa abamayanu banyoolanga amasila amanji.

²²Obubeyi neshisinyo khu OMWAMI Nyasaye, nebutswa abakholanga akobwisiikwa bamuchamisinjia.

²³Omundu omuchesi abisanga obumanyibwe, nebutswa omuyingwa alanjilisinjia habulafu obuyingwabwe.

²⁴Okhukhola emilimo neshinani khumeetanga omundu obunyali, nebutswa abakara balilunyibwa okhuba abasumba.

²⁵Okhuhenda omwoyo khunulanga omundu obusaangafu, nebutswa amakhuwa amalayi katsaatsahasinjia omundu.

²⁶Omundu omulunjishi ahananga amebaalo amalayi khubetsabe, nebutswa tsinjila tsiabamayanu netsiokhukora.

²⁷Omuyimi omukara shiasambanga esholuyitsi ta, nebutswa oweshinani anyoolanga obuyinda bwobukusi.

²⁸Obulunjishi niyinjila yobulamu, nebutswa obumayanu buchoomanga emakombe.