Read wanga TSINJELO 13 Bible Online

TSINJELO 13 - wanga bible

TSINJELO 13

¹Omwana omuchesi aheelanga amechesio kasamwana, nebutswa oweshileka shiahulilanga nahalabilwa tawe.

²Omundu omulunjishi anyoolanga amalayi okhurula mumakhuwake, nebutswa obwikombi bwomukhobi nokhukhola induli.

³Oulindanga olulimilwe alindanga obulamubwe, ne abo aberobotsanga basikhanga.

⁴Omukara yekombanga butswa, nebutswa shianyoolanga eshindu shiosi tawe, nebutswa aweshinani anyoolanga ebindu ebinji bia yenya.

⁵Omulunjishi asilanga obubeeyi, nebutswa omumayanu akholanga akeshifimbwa murwe nende aketsisoni.

⁶Obulunjishi bulindanga owenjilaye yili ingololofu, nebutswa obwonooni bukwisinjia omumayanu.

⁷Abandu bandi bekholanga okhuba abayinda, ne babula eshindu, ne abandi bekholanga okhuba abamanani, ne nibali nobuyinda obunji.

⁸Obununuli bwobulamu bwomundu nobuyindabwe, nebutswa omumanani abula eshiokhumuhonokosia.

⁹Abalunjishi bali shinga itaha eyakhanga obulayi, nabo abamayanu bali shinga itaha eyimwemwenda niyisima.

¹⁰Isunga yireeranga butswa amayingaane konyene, nebutswa obuchesi buli mu abarecheresinjia amebaalo.

¹¹Obuyinda obunyoolwa mutsinjila tsiabwangu, bulakhamuukha bwangu, nebutswa oubunjelesia butiiti butiiti abukhola okhwinjiha.

¹²Eshia onaaya okhunyoola nishishinda okhwikholekha, shikhulwasinjia omwoyo, nashio eshia wikoomba nishinyoolekha, shibetsanga omusaala kwobulamu.

¹³Omundu oulechelesinjia amebaalo yereereranga omwene obusasishi, nebutswa ouloondanga lilako alaheebwa ikhabi.

¹⁴Amechesio komundu omuchesi neisebele yobulamu, kahonokosinjia omundu okhurula mumireko echielifwa.

¹⁵Oburechelefu bureeranga olukoosi, nebutswa injila yomumayanu neyamatinyu.

¹⁶Omuchesi akholanga buli shindu mubumanyi, nebutswa omuyingwa alolesinjia habulafu obuyingwabwe.

¹⁷Omurume omumayanu aretsanga abandu mumasila, nebutswa omurume omwisiikwa areeranga omulembe.

¹⁸Obumanani nende eshifimbwa murwe biitsanga khu oyo oulobanga okhwibaalilwa, nebutswa ourecheresinjia okhuhalabilwa ahebungwa oluyali.

¹⁹Okhunyoola eshindu shia wikoomba khukhusangasinjia mumwoyo, nebutswa okhwihanya okhurula khubumayanu neshisinyo khubayingwa.

²⁰Ouchenda nabachesi, achesihala, naye ouchenda nabayingwa asaalila.

²¹Amasila kalondachililanga abonooni, nebutswa abalunjishi barungungwa eshihaanwa eshilayi.

²²Omundu omulayi aleshelanga abolwibulolwe obulaame, nebutswa obuyinda bwomwonooni bubishilungwa abalunjishi.

²³Omukunda kwomumanani kurusinjia ebiliibwa ebinji, nebutswa bibukulungwa okhuburira mubukhalachi obushiamu.

²⁴Oulahesinjia omwanawe eshinyasio ta, shiyamuheela tawe, nebutswa owaheela omwanawe amuchetsiyinjia khale khale.

²⁵Abalunjishi bali nebiokhulia ebinji ebiokhubekusia, nebutswa abamayanu balumungwa inzala buli lwosi.