Read wanga TSINJELO 14 Bible Online

TSINJELO 14 - wanga bible

TSINJELO 14

¹Omukhasi omuchesi yombakhanga inzuye, nebutswa omuyingwa achisambulanga namakhonoke omwene.

²Ouchendanga mubulunjishi aritsanga OMWAMI Nyasaye, naye ouchendanga mutsinjila tsishiamu, alechelesinjia Nyasaye.

³Omuyingwa yesalisia omwene namakhuwake akobuyingwa, nebutswa omuchesi alindwa namakhuwake.

⁴Aha tsing'ombe tsiokhulima tsibula, ebiachi bibetsanga ebikhaya, nayo imele inyinji yinyoolekhanga khulwa amaani amanji ketsing'ombe tsiokhulima.

⁵Omuloli omwisiikwa shiabeeyanga tawe, nebutswa omuloli omubeeyi afutsululanga obubeeyi.

⁶Omukokonyi akhabilisinjia obuchesi, ne shiabunyoola ta, nebutswa ouli nobumanyi anyoolanga obumanyilisi bwangu.

⁷Orule bwangu aha omuyingwa ali, okhuba yaho shiolanyoolaho obumanyi bwosi ta.

⁸Obuchesi bwabachesi bubamanyisinjia ewa batsia, nebutswa obuyingwa bwabayingwa bubakosinjia abeene.

⁹Abayingwa batseshelelanga obwonooni, nebutswa abalunjishi banyoolanga olukoosi okhurula khu Nyasaye.

¹⁰Omwoyo kumanyanga obutsunwi bwakwo, ne omucheni shianyala okhusanga mumwikhoyo kwakwo ta.

¹¹Inzu yomumayanu yilasasibwa, nebutswa liheema liomulunjishi liralila.

¹²Injila eyomundu apaara mbu neingololofu, obumalilishi bwayo buchoomanga mukhufwa.

¹³Okhutsekha khufisanga eshibeela, ne olunyuma lwobusangaali, eshibeela shitsa.

¹⁴Abandu abamayanu bachesanga ebiamo ebieinjenda yabwe, nabo abalunjishi banyoolanga ikhabi khulwa ebikhole biabwe ebilayi.

¹⁵Omuyingwa asuubilanga buli likhuwa liaboolelwa, nebutswa omuchesi ahenjelesinjia injendaye.

¹⁶Omundu omuchesi yechendelesinjia, khandi yehanyanga okhurula khubwonooni, nebutswa omuyingwa shiyeleshesinijia ta, khandi shiyechendelesinjia tawe.

¹⁷Omundu outiilungwa liruma bwangu, akholanga akobuyingwa, nebutswa omuchesi yesimilisinjia.

¹⁸Abayingwa balalaamilwa obuyingwa, nebutswa abachesi bafwalungwa olusimbi lwobumanyi.

¹⁹Abamayanu balasikama imbeli wabalunjishi, nabo ababi balasikama habilibwa biabalunjishi.

²⁰Omumanani asilungwa nende abamenyanibe, nebutswa omuyinda abetsanga nabetsa abanji.

²¹Omundu ouchayaanga omumenyaniwe yonoonanga, nebutswa noweikhabi oukholelanga omutakha akeshisa.

²²Ourechekhanga amabi toto akholanga obwonooni, Nabo abaloosinjia okhukhola amalayi banyoolanga obuholo nende obwisiikwa.

²³Okhukhola buli omulimo neshinani, khureeranga inganga, amakhuwa amakhaya kareeranga obutakha.

²⁴Olusimbi lwabachesi nobuchesi bwabwe, nebutswa abayingwa bafwalungwa olusimbi olwa abayingwa.

²⁵Omuloli wobwatoto ahoninjia obulamu, nebutswa omubeeyi nomukhobi.

²⁶Ouritsanga OMWAMI Nyasaye ali nobunayi oburalilu, ne abaanabe balaba nobwilushilo.

²⁷Okhuria OMWAMI Nyasaye ni isebele yobulamu, khandi khuchilanga omundu yehonokosia okhurula khumureko kwokhufwa.

²⁸Oluyali lwomuruchi nobunji bwabandube, nebutswa omuruchi oubula abandu asikhanga.

²⁹Omundu oulatiilungwa neliruma bwangu ta, ali nobumanyilisi obunji, nebutswa outiilungwa neliruma bwangu akhusinjia obuyingwa.

³⁰Okhuba nomulembe mumwoyo khuhaananga obulamu khumundu, nebutswa okhwikomba khubosinjia amakumba.

³¹Ousandinjia omumanani, anyekanga Nyasaye Omulonjiwe, nebutswa oulolesinjia tsimbabasi khubatakha ahelesinjia Nyasaye oluyali.

³²Abamayanu besasinjia abeene, khulwa ebikhole biabwe ebibi, nebutswa abalunjishi balindungwa neinjenda yabwe indayi.

³³Obuchesi bumenyanga mumwoyo kwomundu owobumanyilisi, nebutswa shibunyoolekhanga mumioyo chiabayingwa tawe.

³⁴Obulunjishi buchinguulanga lihanga, nebutswa obwonooni neshifimbwa murwe khubandu boosi.

³⁵Omuruchi akoosinjia omukhalabani oumukhalabanila mubuchesi, nebutswa asinyishilanga oumukholela aketsisoni.