Read wanga TSINJELO 15 Bible Online

TSINJELO 15 - wanga bible

TSINJELO 15

¹Likalusio lihoya likalusinjia liruma hasi, nebutswa likhuwa lilulu liyakulanga liruma.

²Olulimi lwomuchesi luhaananga obumanyi, nebutswa abayingwa bafutsululanga obumayanu.

³Tsimoni etsia OMWAMI Nyasaye tsilolanga buli habundu, tsilolanga ababi nende abalayi.

⁴Olulimi oluholo neshisina shiobulamu, nebutswa obumayanu bwalwo bubeelesinjia omwoyo.

⁵Omuyingwa achaayanga obuchetsiyi bwa samwana, nebutswa oufuchililanga okhuhalabilwa nomuchesi.

⁶Munzu mwomulunjishi mulimwo emiandu eminji, nebutswa inganga yomumayanu neyamatinyu.

⁷Omunwa kwomuchesi kulandinjia obumanyi, nebutswa shikali kario khumwoyo kwomuyingwa tawe.

⁸Omusango kwomumayanu neshisinyo khu OMWAMI Nyasaye, nebutswa amasaayo komulunjishi kachamisinjia Nyasaye

⁹Injila yobumayanu neshisinyo khu OMWAMI Nyasaye nebutswa Nyasaye aheelanga omundu oulondanga obulunjishi.

¹⁰Eshinyasio eshilulu shiliho khu ourula khunjenda indayi, yesi ouloba okhuhalabilwa alafwa.

¹¹OMWAMI Nyasaye amanyile akali emakombe nende akali mushialo shiabafu koosi, kho yakhakorwa arie amapaaro kabandu?

¹²Abakokonyi shibenyanga okhuhalabilwa tawe, kho shibakhabangakhwo obwibaali okhurula khubachesi tawe.

¹³Omwoyo omutsaatsahafu kusangasinjia mumoni, nebutswa eshibeela shifwisinjia omwoyo.

¹⁴Owobumanyilisi akhabanga obumanyi, nebutswa abayingwa belisiinjia obuyingwa.

¹⁵Tsinyanga tsiobulamu bwomutakha tsiosi netsiokhupa khushibi, nebutswa abemioyo emisangafu balitsanga lisabo buli lwosi.

¹⁶Nobulayi okhuba ninabio bitiiti, ne noria OMWAMI Nyasaye, okhushila okhuba nemiandu eminji, ne nokhupa khushibi.

¹⁷Nobulayi okhulia eliani liamasafu mubuheeli, okhushila okhulia inyama yeing'ombe inulu ahobusuku buli.

¹⁸Oweliruma lilulu abuusinjia obusoolo, nebutswa oulatiilungwa neliruma bwangu ta, areeranga omulembe.

¹⁹Injila yomukara yetsulakhwo amahwa, nebutswa eyomulunjishi yili shinga omuhanda, omukololofu.

²⁰Omwana omuchesi asangasinjia samwana, nebutswa omuyingwa achaayanga nyinamwana.

²¹Obuyingwa busangasinjia oubula obuchesi, nebutswa omundu wobumanyilisi achendanga khunjila ingololofu.

²²Amakhuwa kabiyanga hobwibaali bubula, nebutswa kabetsanga amalayi habebaali bali abanji.

²³Okhukalusia likalusio lia habwene lisangasinjia buli omundu, nalio likhuwa eliboolwa mubise ebikhoyile nelilayi muno!

²⁴Injila yomuchesi yichoomanga ikulu khubulamu, kho mbu aleshe okhutsia hasi emakombe.

²⁵OMWAMI Nyasaye asambulanga inzu yomwichinjimisi, nebutswa alindanga tsinzakho tsiomukhasi omulekhwa.

²⁶Amapaaro amamayanu neshisinyo khu OMWAMI Nyasaye, nebutswa amakhuwa amalayi kamusangasinjia.

²⁷Owikoomba okhunyoola inganga munjila yishiamu, areereranga abeinzuye amatinyu; nebutswa oulabukulanga eshiomufusi ta, alabaho mwoyo.

²⁸Omulunjishi ayililisinjia mumwoyo nashili okhuhana likalusio, nebutswa omunwa kwomumayaanu kufutsululanga amakhuwa amabi.

²⁹OMWAMI Nyasaye ali ehale khubamayanu, nebutswa arecheresinjia amasaayo kabalunjishi

³⁰Obweni obusaangaafu butsaatsahasinjia omwoyo, nako amakhuwa amalayi kasakulusinjia omubili.

³¹Omundu ourekanga eshirwi olwa ahalabilwa, alabalilwa mubachesi.

³²Oulobanga okhwibaalilwa yelechelesinjia omwene, nebutswa oufuchililanga okhuhalabilwa anyoolanga obumanyilisi.

³³Okhuria OMWAMI Nyasaye nokhweka obuchesi, ne okhuula oranjilile okhwituutuyia kho onyoole oluyali.