Read wanga TSINJELO 16 Bible Online

TSINJELO 16 - wanga bible

TSINJELO 16

¹Omundu aloosinjia akokhukhola mumwoyokwe, nebutswa OMWAMI Nyasaye niye oukakholanga okhwikholekha.

²Akomundu akholanga anyala okhupaara mbu koosi nakahabwene, nebutswa OMWAMI Nyasaye ahenjelesinjia akomumwoyo.

³Ore emilimochio khu OMWAMI Nyasaye, ne koosi aka oloosia okhukhola kalekholekha obulayi.

⁴OMWAMI Nyasaye yalonga buli eshilonje nelichoomo liashio, kata abamayanu khulwa inyanga yobusasishi.

⁵Boosi abechinjimisinjia neshisinyo khu OMWAMI Nyasaye, toto bwene shibalachweya okhunyoola eshinyasio tawe.

⁶Obuheeli oburalilu nende obwisiikwa bufuunikhanga obwonooni, ne khulwa okhuria Nyasaye, omundu yehanyanga okhurula khubumayanu.

⁷Tsinjila tsiomundu nitsichamisia OMWAMI Nyasaye, akholanga kata abasukube okhuba mumulembe ninaye.

⁸Nobulayi okhuba ninabio bitiiti bionyooleele mubulunjishi, okhushila ebinji bionyooleele munjila etsilali tsiahabwene ta.

⁹Omundu arechekhanga mumwoyokwe aka yenya okhukhola, nebutswa OMWAMI Nyasaye niye oumwimililanga okhukakhola.

¹⁰Omuruchi aboolanga niyemililwe nende Nyasaye, ne olwa aboola obukhalachibwe shiyonoonanga tawe.

¹¹OMWAMI Nyasaye yenyanga ebichelo nende tsiratili tsiahabwene, khandi amachina akokhuchela obukusi bwebindu nakeke.

¹²Nakeshisinyo abaruchi okhukhola obumayanu, okhuba obulunjishi nibwo oburalisinjia oburuchi.

¹³Omuruchi asangasibungwa nomundu ouboolanga aka habwene, khandi aheelanga ouboolanga obwatoto.

¹⁴Liruma liomuruchi lili shinga omurume wokhureera lifwa, ne omuchesi niye ounyala okhukalusia liruma elo hasi.

¹⁵Obweni bwomuruchi nibutsaatsahala obulamu buliho, ne obulayibwe buli shinga amaleesi akeifula yomurootso.

¹⁶Nobulayi muno okhuba nobuchesi okhushila okhuba neitsahabu, khandi okhwahula obumanyilisi khushila okhwahula ifetsa.

¹⁷Omuhanda kwabalunjishi kwihanyanga okhurula khubumayanu, abo abalindanga injila yabwe balindanga obulamu bwabwe

¹⁸Obwichinjimisi bureeranga obusasishi, nakwo omwoyo kwokhwilola kureeranga okhukwa.

¹⁹Nobulayi okhuba nomwoyo okwokhwituutuyia, ne obe mulala khubatakha, okhushila okhukabana ebiobunuuli nende abechinjimisi.

²⁰Omundu ouhulilanga amebaalo alanyalilwa, ne noweikhabi ouwisikanga OMWAMI Nyasaye.

²¹Owobuchesi mumwoyo alangwa mbu omwitembelesi, nako amakhuwa amanyushe kahombelesinjia.

²²Obuchesi neisebele yobulamu khu ouli ninabwo, nebutswa obuyingwa neshinyasio khubayingwa.

²³Amachesi komundu omuchesi kamunyalilanga okhuboola habwene, ne obuboolibwe buhombelesinjia.

²⁴Amakhuwa amalayi kali shinga obuushi oburonya, namamilamilu khumwoyo, khandi obulamu khumubili.

²⁵Injila yomundu apaara mbu neingololofu, obumalilishi bwayo buchoomanga mukhufwa.

²⁶Obwikombi bweshiokhulia bukholanga omukholi okhukhola emilimo neshinani, khandi bumulunyinjia okhutsiliila okhukhola emilimo.

²⁷Omundu omumayanu arechekhanga obumayanu, nako amakhuwake kali shinga omulilo omululu.

²⁸Omumayanu asalasinjia induli, naye oweinzoka okholanga abeetsa abaheelana bakabukhana.

²⁹Omundu omurasi akatilisinjia omumenyaniwe, mana amwimilila munjila eyilali indayi tawe.

³⁰Omundu oufiinya imoni abetsanga naloosiye amakhuwa amabi, naye ousuninjia omunwakwe abetsanga nakaasiye amakhuwa amamayanu.

³¹Tsimbutsi nolusimbi lwoluyali, tsinyoolekhanga mubulamu bwobulunjishi.

³²Oulatilungwa neliruma liabwangu ta, ashila owamaani, naye ourukanga omwoyokwe ashila outiila litookho liosi.

³³Ikha yikhupungwa okhwahula amakhuwa, nebutswa obukhalachi bwene nobwa Nyasaye.