Read wanga TSINJELO 18 Bible Online

TSINJELO 18 - wanga bible

TSINJELO 18

¹Omundu owikhabilanga akeke yenyene, yeyahulanga okhurula khubashie, khandi asinyikhanga nachelelwa habwene nomundu omuchesi.

²Omuyingwa shiasangalilanga obumanyilisi ta, khandi eshiachamanga nokhuboola aka ye omwene amanyile.

³Olwa obumayanu bwitsa, okhufwolwa khwosi khandi khwitsa, nakhwo okhuchaaywa khwitsanga halala netsisoni.

⁴Amakhuwa komundu kali shinga isebele yamaatsi, nashio eshisina shiobuchesi shili shinga amaatsi komwalo okubiranga.

⁵Shibuli obulayi okhuterera omundu omumayanu, noho okhushiamia obukhalachi bwa habwene khumundu omulunjishi tawe.

⁶Amakhuwa akomuyingwa kareeranga oburasi amakhuwake kamureereranga amakhupache.

⁷Amakhuwa akomuyingwa kamureereranga obusasishi omwene, omunwakwe nomureko kwokhutiila ye omwene.

⁸Amakhuwa akomundu omumoonyi kali shinga eshiokhulia eshinulu, kenjilanga nikakholomokha okhuula mumubili mukari.

⁹Omundu omukara mumilimo, nomubi butswa shinga omundu ousasinjia.

¹⁰Eliira elia OMWAMI Nyasaye nolukoba lwamaani, omundu omulunjishi yelushilangamwo, mana aba mumulembe.

¹¹Nebutswa omuyinda apaaranga mbu obuyindabwe nelitookho eliasirwa obutinyu, khandi mbu nolukoba olurambi olulamulinda.

¹²Okhwichinjimisia mumwoyo khureeranga obusasishi, nebutswa okhwituutuyia khureeranga oluyali.

¹³Okhuhaana likalusio noshili okhurecheresia, nobuyingwa khandi eshifimbwa murwe.

¹⁴Omwoyo kwomundu kunyala okhwifwiila obulwale, nebutswa nikuba nikufwililile, ounyala okhwifwiila niwiina?

¹⁵Omundu wobumanyilisi, anyoolanga obumanyi, khandi eshirwi shiomuchesi shikhabanga obumanyi.

¹⁶Eshihaanwa shikasilinjia ouhaananga injila, khandi shimwinjisinjia ewomukhongo.

¹⁷Ouranjilila okhuboola amakhuwake mumuse alolekhanga okhuba owahabwene, okhuula olwa owashie achaaka okhumurebelesia.

¹⁸Okhukhupa ikha khwakaminjia amayinje, khandi khukabukhaninjia abamaani nibayingana mushina.

¹⁹Nokhoonya owonoonelwe ne aba omutinyu shinga litookho liamaani, obusoolo obwo bulamukhola okhuba shinga emiyinjilo chiamaani.

²⁰Amakhuwa akomunwa kanyala okhwikusia inda, akarula mumunwa kareeranga inzikura.

²¹Olulimi luli nobunyali bwokhuhaana obulamu noho okhwira, abaheela okhulwikhoonyela balalia ebiamo bialwo.

²²Omusaatsa ounyoola omukhasi, anyoola eshindu eshilayi, khandi anyoola obukoosia okhurula khu OMWAMI Nyasaye.

²³Omumanani asabanga mukhwitutuyia, nebutswa omuyinda akalusinjia likalusio nobululu.

²⁴Baliho abeetsa abekaatinjia mbu nabeetsa batoto, nebutswa omwitsa watoto abetsanga ahambi ninawe okhushila owenyu mwene.