Read wanga TSINJELO 2 Bible Online

TSINJELO 2 - wanga bible

TSINJELO 2

¹Mwana wanje, noba nofuchilila amakhuwa kanje, khandi nobiikha amalako kanje mumwoyokwo,

²noba noreka eshirwishio okhuhulila obuchesi khandi nora omwoyokwo khukhunyoola obumanyilisi,

³noba nohaaba toto okhunyoola obuchesi, ne nochinguula omwoyokwo okhunyoola obumanyililsi,

⁴noba nobukhaaba shinga oukhaba ifeetsa, khandi noburunilisia shinga ourunilisia ebindu ebiolukoosi biayabilwa mwiloba,

⁵nolwa olamanyilisia okhuria OMWAMI Nyasaye, khandi olamanya Nyasaye.

⁶Okhuba OMWAMI Nyasaye ahaananga obuchesi, obumanyi nende obumanyilisi birulanga mumunwakwe.

⁷Abishilanga abalunjishi obuchesi bwatoto. Ye neingabo khwabo abechendelisinjia mushilongoole.

⁸Atetsanga abo, abakholanga akahabwene, khandi alindanga abesikwabe.

⁹Noba niurecheresia olamanyilisia obulunjishi, nende obukhalachi bwahabwene, khandi olamanya okhuchenda khunjila indayi.

¹⁰Olanyoola obuchesi mumwoyokwo, khandi obumanyi bulakhusangasia

¹¹Obuchesi bulakhulinda, nabwo obumanyilisi bulakhutetsa.

¹²Bulakhuhonia okhurula khubumayanu, khandi bulakhuhonia okhurula khu abo ababoolanga akobumayanu,

¹³abandu abalekhanga tsinjila tsinunji, ne nibachenda khutsinjila tsieshilima,

¹⁴abandu abasangalilanga okhukhola amabi, khandi abekhoyelanga obumayanu,

¹⁵abandu abetsinjila tsiabwe tsiashiama, khandi abalanyala okhusuubilwa tawe.

¹⁶Obuchesi bulakhuhonia okhurula khumukhasi omutamba, bulakhuhonia okhurula khumukhasi omutamba owamakhuwa amanyushe.

¹⁷Omukhasi oulekhanga omusaatsawe owamuteshia nashili omuraaka, khandi yebilila indakano ya yakhola imbeli wa Nyasaye.

¹⁸Okhuba injilaye yitsitsanga mulifwa, natsio tsinjilatsie tsitsitsanga emakombe.

¹⁹Abulaho omusaatsa oumucheniyanga mana achelela omulamu, noho akalukha khunjila yobulamu tawe.

²⁰Khulweshio ochende mutsinjila tsiabandu abalayi, khandi olonde khumihanda chiabalunjishi.

²¹Okhuba abalunjishi balamenya mushialo, abo ababula eshikha balatong'aho mushialo.

²²Nebutswa abamayanu balarusibwa mushialo, abonoono balarusibwa mushialo.