Read wanga TSINJELO 20 Bible Online

TSINJELO 20 - wanga bible

TSINJELO 20

¹Idivai yireeranga amanyeko, nako amalwa kareeranga obusoolo. Omundu yesi oukoyasibwa ninabio shiali nobuchesi tawe.

²Liruma lilulu liomuruchi lili shinga okhuhoola okhweitalanyi, ousinyisinjia omuruchi yeyiranga omwene.

³Nobulayi omundu okhwihanya okhurula khuburasi, nebutswa omuyingwa achaachinjia obusoolo bwangu.

⁴Omukara shialimanga omukunda mubise biakwo ta, mwichesa shialikhwo nende eshiokhuchesa tawe.

⁵Amapaaro komundu kebisa shinga amaatsi kolusiba, nebutswa owobumanyilisi niye oulakataha.

⁶Abandu abanji beboolangakhwo mbu nabetembelesi, nebutswa omwisiikwa mubo ali heena?

⁷Omulunjishi nachenda mushilongooleshie, abaanabe abalekha inyumawe balaba abeikhabi.

⁸Omuruchi owikhala khushisalashie eshiobukhalachi, aseletsanga obumayanu bwosi netsimonitsie.

⁹Niwiina ounyala okhuboola mbu, “Esiiyile omwoyo kwanje, khandi endi omusiiyikhu khubwonooni bwanje?”

¹⁰Amachina akeiratili akobubeeyi nende ebichelo biobubeeyi, biosi nebieshisinyo khu OMWAMI Nyasaye.

¹¹Kata omwana amanyikhanga khulwa ebikholebie, ebikholebie nibiba nibili ebisiiyikhu khandi biobulunjishi.

¹²Eshirwi eshihulilanga nende tsimoni etsilolanga, biosi bialongwa nende OMWAMI Nyasaye.

¹³Shiolaheela okhukona tsindoolo ta, nebutswa olaba omumanani, obe meeso, ne olaba nebiokhulia ebinji.

¹⁴Oukula eshindu, buli lwosi yeyiniakananga naboola ari, “Obukusi buli ikulu muno,” nebutswa niyakharulaho yeyitsiala naboola mbu akholelwe obukusi obulayi.

¹⁵Itsahabu yiliho khandi amachina kobukusi amanji kaliho, nebutswa eshiobukusi obweikulu muno namakhuwa kobumanyi.

¹⁶Omundu nasinjilila omurende shinga omusingo, obukule inguboye, otiile eshiasuubisiye shinga omusingo khulwa omundu omucheni oyo.

¹⁷Eshiokhulia shiobwifi neshinulu khumundu, nebutswa olunyuma shili shinga omuyeshe mumunwa.

¹⁸Obuloosie obulayi bunyoolekhananga okhubirira mukhwibaalilana, niwenya okhuseera lihe okhuula oranje oyililisie.

¹⁹Omumoonyi shiabiikhanga akamisiliisi ta, khulweshio wihanye okhurula khumundu wokhwirobootsa.

²⁰Oyo oulaama samwana noho nyinamwana eshilaamo shiobubi, itahaye yilasimibwa mushiilima eshimali ti.

²¹Obuyinda obunyoolekha bwangu bwangu mukhuchaaka, shibubetsanga netsikhabi mubumalilishi tawe.

²²Shioleboolela omwene ori, “Ndalarunga amabi khukandi,” tawe, wileete khu Nyasaye, naye alakhukhoonya.

²³Amachina akeiratili akobubeeyi neshisinyo khu Nyasaye, nabio ebichelo biobubeeyi shinebilayi tawe.

²⁴Tsinjila tsiomundu tsiamala okhukasibwa nende OMWAMI Nyasaye, ne omundu yakhamanya arie tsinjilatsie omwene?

²⁵Nomureko khumundu okhurumukha okhwitsuba naboola ari, “Shino neshitakatifu, eshihaana khu Nyasaye,” mana namalile okhwitsuba kho ayililisie khu eshiayetsubile eshio.

²⁶Omuruchi omuchesi arunilisinjia okhumanya abamayanu, mana abahelesia eshinyasio nalabalolelakhwo tsimbabasi tawe.

²⁷Roho womundu niyo itaha eya OMWAMI Nyasaye, eyikhosinjia okhuula mukari mwene.

²⁸Obwatoto nende obwisiikwa bilindanga omuruchi, nabwo obulunjishi buralisinjia oburuchibwe,

²⁹Oluyali lwababuukha namaani kabwe, nebutswa ing'oono yabakofu nomurwe kwetsimbutsi.

³⁰Amakhupache akasalisia karusinjiaho obumayanu, ne okhunywekhwa netsisaala khulafinjia omundu okhuula mukari bwene.