Read wanga TSINJELO 21 Bible Online

TSINJELO 21 - wanga bible

TSINJELO 21

¹Omwoyo kwomuruchi kuli shinga amaatsi akachetulukha, OMWAMI Nyasaye akwimililanga okhuchooma hosi aha yenya.

²Ebikhole biomundu bilolekhanga okhuba ebilayi mumonimwe omwene, nebutswa OMWAMI Nyasaye ahenjelesinjia omwoyo.

³Okhukhola akobulunjishi nende akahabwene, kamuchamisinjia OMWAMI Nyasaye okhushila okhumuhaanila omusango.

⁴Okhwilola nende omwoyo kwokhwichinjimisia, nibio ebilolesinjia habulafu obubi obwabonooni.

⁵Amapaaro keshinani kachoomanga khumiandu eminji, nebutswa buli omundu ouyuyukhana achoomanga khubutakha.

⁶Obuyinda obunyoolekha munjila yishiamu, buli shinga omwosi okutumuukha khandi nomureko kwelifwa.

⁷Induli yabamayanu yilabasasia abeene, okhuba balobanga okhukhola akahabwene.

⁸Injila yomumayanu neyishiamu, nebutswa injila yomulunjishi neyingololofu.

⁹Nobulayi okhumenya hekulu khunungo, okhushila okhumenya halala nomukhasi wokhusoolana.

¹⁰Omwoyo kwomumayanu kwikombanga amabi, shialolesinjiakhwo tsimbabasi khumumenyaniwe tawe.

¹¹Omukokonyi nahebwa eshinyasio, omwitutuyi anyoolanga obuchesi. Ne omuchesi niyebaalilwa, yemeetanga obumanyi.

¹²Nyasaye ouli omulunjishi alolanga kabamayanu bakholanga mutsinzu tsiabwe, mana abakwisia hasi nende okhubasasia.

¹³Oulobanga okhuhulila okhuhaba khwomumanani, yesi khandi olwa alihaaba mbu akhoonywe abulaho oulihulila okhuhaabakhwe tawe.

¹⁴Eshihaanwa eshiomundu ahaana mumasilisi shisiminjia obusinyishi, nashio eshihaanwa shiomufusi shisiminjia liruma lilulu.

¹⁵Obukhalachi bwahabwene busangasinjia abalunjishi, nebutswa businyisinjia abamayanu.

¹⁶Outimatimanga narula khunjila yobumanyilisi, alihulukha halala mumukanda kwabafu.

¹⁷Oyo owachama okhwitsaatsahasia mubulamu alikwa omumanani, naye owachama okhunywa idivai nende ebiokhulia ebilayi shialihindihala tawe.

¹⁸Omundu omumayanu alanyoola eshinyasio mushilenje shiomulunjishi, naye oulali omwisiikwa ta alanyoola eshinyasio mushilenje shiomukololofu.

¹⁹Nobulayi okhumenya mushitsiimi, okhushila okhumenya halala nomukhasi wobusoolo nende liruma.

²⁰Inzu yomuchesi yilimwo ebindu biobukusi, nebutswa omuyingwa asasinjia obuyinda bwanyoola bwosi.

²¹Omundu ouloondachila obulunjishi nende obuheeli, alinyoola obulamu oburambi nende oluyali.

²²Omundu mulala omuchesi anyala okhuseera litookho eliabalwani abalulu, khandi anyala okhukwisia tsingoba tsia besikanga.

²³Omundu oulindanga omunwakwe nende olulimilwe, yelindanga omwene okhurula khumasila.

²⁴Omundu omwichinjimisi khandi oweisunga alangwa mbu, “omukokonyi,” ne akholanga amakhuwake mu isunga nende mubwichinjimisi.

²⁵Omukara afwitsanga khulwa okhukhaywa okhunyoola ebia yekomba, okhuba amakhonoke katofulanga okhukhola omulimo.

²⁶Omumayanu yekombanga ebinji eshiteere shiosi, nebutswa omulunjishi ahaananga butswa nomwoyo kwosi.

²⁷Omusango kwomumayanu neshisinyo khu OMWAMI ne nokweshisinyo muno nikuba nikuhaanwa nomwoyo omubi.

²⁸Omuloli omubeeyi alasikha, nebutswa omurecherefu alaboola obulolibwe obulayi.

²⁹Omumayanu yeyuminjia mumoni, nebutswa omulunjishi ayililisinjia mukakhola.

³⁰Bubulaho obuchesi, noho obumanyilisi kata obwibaali, obunyala okhuyinga OMWAMI Nyasaye.

³¹Ifarasi yirechekhungwa khulwa inyanga yelihe, nebutswa obuhuli burula khu OMWAMI Nyasaye.