Read wanga TSINJELO 22 Bible Online

TSINJELO 22 - wanga bible

TSINJELO 22

¹Nobulayi okhuba neliira lilayi okhushila okhuba nobuyinda obunji, khandi obukoosia nobulayi okhushila ifetsa nende itsahabu.

²Abayinda nende abamanani bali nashilala mwikhuwa lino mbu, OMWAMI Nyasaye niye owabalonga boosi.

³Omundu omuchesi alolanga amabi nikeetsa mana yebisa, nebutswa omuyingwa atsiilililanga butswa mana asaalila.

⁴Omurungo kwokhwituutuyia nende okhuria Nyasaye, nobuyinda, oluyali nende obulamu.

⁵Injila yabamayanu yetsulakhwo amahwa nende emireko, nebutswa abechendelesi mubulamu behanyanga okhurula khuko.

⁶Wechesie omwana shinga olwa akhoyile okhumenya obulayi, ne olwa akofula shialebilila ta.

⁷Omuyinda arukanga omumanani, naye owihola nomusumba owa oyo oumuhosia.

⁸Ouraka obumayaanu alachesa amasila, ne obunyalibwe bwokhukhola amamayanu bulasasibwa.

⁹Omuhaani aheebungwa tsikhabi, okhuba akabananga eshiokhuliashie nende omumanani.

¹⁰Rusiaho omukokonyi ne obuyingani bulahwa, nabwo obusoolo nende amanyeko bilahwa.

¹¹Omundu owaheela okhuba nomwoyo omweleleshe khandi wamakhuwake kali akobukoosia alaba omwitsa womuruchi.

¹²OMWAMI Nyasaye alindanga obumanyi, nebutswa ayininjiaho amakhuwa aka abalali abesiikwa ta.

¹³Omundu omukara aboola ari, “Shienyala okhurula elwanyi ta, italanyi yiliyo yilanzira.”

¹⁴Omunwa kwomukhasi omuheyi nobuko oburambi, ne owa OMWAMI Nyasaye asinyishila alakwamwo.

¹⁵Obuyingwa bwetsula mumwoyo kwomwana, nebutswa olusaala lwobuchetsiyi, luburusia muye.

¹⁶Omundu ousandinjia abamanani kho mbu yemeete obuyinda, nende oyo ouhelesinjia omuyinda ebihaanwa, boosi balekhola abanani.

¹⁷Reka amarwi oulile amakhuwa kabachesi, orekhwo omwoyo okhuhulila obumanyilisi bwanje,

¹⁸okhuba kalakhukasila noba nakabiikha mumwoyokwo, khandi nokarumbula koosi nomunwakwo.

¹⁹Ndenya okhukhwechesia inyanga yino, kho mbu wisichenje OMWAMI Nyasaye.

²⁰Ekhuhandichile tsinjelo amakhumi kataru, tsinjelo tsiokhukhuchetsiyia khandi tsiobumanyilisi.

²¹Tsilakhwechesia kahabwene khandi akobwatoto, kho mbu okalusie likalusio liahabwene khu abo abakhureeba.

²²Shiolasandia omumanani shichila mbu nomumanani ta, kata olamiina omutakha mushiina tawe,

²³shichila OMWAMI Nyasaye alabatererera mushina, khandi alarusiaho obulamu bwa ababasandia.

²⁴Shiolakhola obwitsa nomundu weliruma tawe, kata olachenda halala nomundu ousinyikhanga bwangu tawe,

²⁵okhuba onyala okhuloonda imeloye ne notiilwa mumureko.

²⁶Shiolabakhwo mulala khu abasuubisania okhurunga likofi, noho abeekholanga omusingo khulwa okhurunga likofi tawe.

²⁷Noba nobula eshiokhurunga, kata eshitali shiawiyalisinjiakhwo shilabukulwa.

²⁸Shiolasiula eshikhoni shiarakwa khale, eshiabakuukabo basimikha tawe.

²⁹Alikhwoho omundu oukholanga emilimo nobusitsa? Oyo alaba omukhalabani womuruchi, shialakhalabanilakhwo abandu butswa tawe.