Read wanga TSINJELO 23 Bible Online

TSINJELO 23 - wanga bible

TSINJELO 23

¹Olwa wikhala okhulia halala nomuruchi, omanyilisie obulayi owa wikhale ninaye.

²Noba noli oweindia ikhongo, witutuyie, olie bitiiti.

³Olekomba ebinulubie ta, okhuba binyala okhuba ebiokhukhukaatia butswa.

⁴Noba noli nobuchesi obuhela, oleechoonyia muno, khulwa okhukhaaba obuyinda tawe.

⁵Obuyindabwo bunyala okhukhamuukha shinga oluhenu, buli shinga obuli netsimbaha, mana nibupulukha nibutsia shinga indutsu.

⁶Shiolalia eshiokhulia shiomundu omwimani, kata okhwikomba ebinulubie tawe.

⁷Okhuba akhuboolelanga ari, “Yitsa olie, khandi onywe!” Nebutswa mumwoyomwe shiakhupaariranga amalayi tawe.

⁸Olasala ebioliile biosi, ne amakhuwako kokhukhupa orio muno kalasikha butswa.

⁹Shiolaboolelakhwo omuyingwa amakhuwako kobuchesi ta, okhuba alachaaya obuchesibwo.

¹⁰Shiolasiula eshikhoni shiakhale shiolwakho, noho okhubukula emikunda chiabaana ababisandu tawe.

¹¹Okhuba OMWAMI Nyasaye niye omununuli wabwe owamaani, niye oulayaala eshiina shiabwe nabaterera khwiwe.

¹²Ore omwoyokwo khu okhweka obuchetsiyi, nako amarwiko khumakhuwa kobumanyi.

¹³Shiolachweya okhuchetsiyia omwanawo tawe, nomunywekha nolusaala shialafwa tawe.

¹⁴Nomunywekha nolusaala, olamuhonokosia okhurula emakombe.

¹⁵Mwana wanje, omwoyokwo nikuba okwobuchesi, kho okwanje kwosi kuba kulasangaala.

¹⁶Omwoyo kwanje kulekhoya noba noboola amakhuwa akobuchesi.

¹⁷Omwoyokwo kulatilwa neshikhalikhali khubonooni tawe, nebutswa kutsililile buli lwosi okhuria OMWAMI Nyasaye.

¹⁸Toto bwene obulamu bwetsinyanga tsiolunyuma buliho, kho obunayibwo bwobulamu obulayi shibularusibwaho tawe.

¹⁹Mwana wanje, recheresia, mana obe omuchesi, ne olinde omwoyokwo khunjila yobulunjishi.

²⁰Shiolasangakhwo nabameesi beidivai, kata abalang'u beinyama tawe.

²¹Okhuba abanywi nende abalang'u balasishila mubumanani, obumeesi obwo bulabakhola okhufwala amatasi.

²²Ohulilenje papawo owakhwibula, ne olachaaya mamawo olwa aba nakofuule tawe.

²³Kula obwatoto, ne shiolabukusia tawe; kula obuchesi, ebiima ebilayi nende obumanyilisi.

²⁴Samwana omwana omulunjishi yekhoyanga muno, naye owibula omwana omuchesi asangaala.

²⁵Sangasia papawo nende mamawo, khola oyo owakhwibula atsaatsahale.

²⁶Mwana wanje, recheresia obulayi, mana oloonde imelo yobulamu bwanje.

²⁷Okhuba omukhasi omutamba nomureko kwobuko oburambi muno, naye omukhasi omuheyi nomureko kweisebele yirambi.

²⁸Okhuba ye akoneshelanga nalinda shinga omunuuli mana akhola abasaatsa abanji okhukhaywa okhuba abesiikwa.

²⁹Niwiina oukhupanga tsimbungu? Niwiina ousinyishe? Niwiina ouwiyiniakananga? Niwiina oulilanga? Niwiina ouli namafumire akalali neshifune? Niwiina owakhaanye tsimoni?

³⁰Nibo abo ababutsanga oluhoono olurambi nibanywa idivai, abo abahonganga nibatsokaasia nende okhutsaama idivai.

³¹Shiolekomba idivai kata olwa yiba niyakhaanye, noho niyibila limela mushikombe, noho niyikha hasi kaala obulayi tawe.

³²Olunyuma idivai yisaalisinjia shinga inzokha, khandi yikhuhelesinjia obufwisi shinga obweshilikoma.

³³Tsimonitsio tsilalola amahweli hweli, nakwo omunwakwo kulaboola amakhuwa amashiamu.

³⁴Olaba shinga omundu oukonile hasi hakari kari weinyanza, khandi shinga omundu oukonile ikulu khubutenje bwomuringoti okweliaro khunyanza tawe.

³⁵Shiolaboolakhwo ori, “Baakhupa nebutswa shindasalisibwa ta! Bakhupile, nebutswa shiembulilangakhwo obutsunwi bwosi bwosi tawe! Ndalabuukha liina, mana ekhaabe idivai yindi khandi.”