Read wanga TSINJELO 24 Bible Online

TSINJELO 24 - wanga bible

TSINJELO 24

¹Shiolakhalishila omukongo abonooni ta, kata okhubakhwo omwitsa wabwe tawe.

²Okhuba emioyo chiabwe chiyililisinjia butswa okhukhola induli, nachio eminwa chiabwe chiboolanga butswa amakhuwa amabi.

³Inzu yumbakhungwa nobuchesi, mana yiralisibwa nobumanyilisi.

⁴Khulwa obumanyi ebisika biayo bitsusibungwa ebindu biobukusi, khandi ebindu biobukondo obulayi.

⁵Okhuba nobuchesi khushila okhuba nobunyali, okhuba nobumanyi nobulayi okhushila okhuba namaani.

⁶Okhuba onyala okhuseera lihe khulwa okhuchelelwa mubuchesi, khandi obuhuli bunyoolekhanga khulwa abacheli abanji.

⁷Nobutinyu muno omuyingwa okhumanyilisia obuchesi, okhuba mumukhung'ano kwabakofu shiachinganga omunwa okhuboola likhuwa tawe.

⁸Omundu yesi ourechekhanga okhukhola amabi, alalangwa mbu oweinzoka.

⁹Akomuyingwa arechekhanga nobwonooni, naye omukokonyi neshisinyo khubandu boosi.

¹⁰Noba nofwa omwoyo khunyanga yamatinyu, kho amaaniko namatuutu.

¹¹Honokosia abo abayilwa okhwiirwa nibabula eshikha, olashinda okhuhonokosia abo abayilwa okhwiirwa nibabula eshikha tawe.

¹²Shiolaboola olunyuma ori, “Ifwe shikhukamanyilekhwo tawe!” Okhuba Nyasaye ouchelanga emioyo chiabandu alolanga, ye omwene alakhurunga okhulondana nende ebikholebio.

¹³Mwana wanje olitsenje obuushi, okhuba obuushi nobulayi, obuushi oburoonyanga okhurula mushicheyo nobumilamilu khwiwe.

¹⁴Kho nolwa buli obuchesi khumwoyokwo noba nobunyoola, kho oba nobulamu obulayi mutsinyanga tsiolunyuma, khandi obunaayibwo shibulahwaho tawe.

¹⁵Shiolakoneshela omundu omulunjishi shinga lwomumayanu akholanga tawe, kata olateema okhusasia inzuye tawe.

¹⁶Okhuba omulunjishi kata nakwa hasi akhandi musafu, okhuula alabuukha khandi. Nebutswa omumayanu alasasilibwa elala namasila.

¹⁷Olekhoya lwomusukuwo anyoola amatinyu tawe, kata omwoyokwo kulasangaala lwomusukuwo yesichirala tawe.

¹⁸Okhuba OMWAMI Nyasaye alalola ako mana akhusinyishile, ne nalekha okhuhelesia omusukuwo oyo eshinyasio.

¹⁹Shiolahenda omwoyo khulwa abandu abakholanga obumayanu tawe, kata olakhalishila omukongo abamayanu tawe.

²⁰Okhuba abamayanu shibalikhwo nobulamu obwolunyuma tawe, khandi itaha yobulamubwabwe yilasimibwa.

²¹Mwana wanje oritsenje OMWAMI Nyasaye nende omuruchi, ne olasangakhwo nende abo abakhayanga okhubahulila tawe.

²²Okhuba obusasishi bwabwe bwitsanga masundusia, ne abulaho oumanyanga amatinyu aka OMWAMI Nyasaye noho omuruchi anyala okhureera tawe.

²³Tsino tsiosi khandi netsinjelo tsiabachesi: Shibuli obulayi okhukhola ebiela nokhalakanga eshiina tawe.

²⁴Omundu yesi ouboolela omumayanu mbu, “Iwe oli omulunjishi,” alalamwa eshilaamo eshiobubi nabandu, khandi alatililwa isila nabamahanga.

²⁵Nebutswa abo abahalabilanga abamayanu balasangaala, khandi balanyoola tsikhabi tsindayi.

²⁶Oyo oukalusinjia likalusio liahabwene, ali shinga oufumbeelela omwitsawe.

²⁷Ranjilila okhole emilimochio chielwanyi, khandi orecheshe omukundakwo, kho mana umbashe inzuyo.

²⁸Shiolaboola obuloli bwobubeeyi khu washio tawe, kata olakatiakhwo nomunwakwo tawe.

²⁹Shiolaboola mbu, “Ndalamukholela aka yaakholeele, okhuula ndalamurunga aka yaakholeele tawe.”

³⁰Ndabirira mumukunda kwomundu omukara, ahambi khumukunda kwemitsabibu kwomundu omuyingwa.

³¹Ne lola, kwosi kwali nikwetsulamwo ebisisia, kwosi kwali nikwetsulamwo liswa, khandi olukoba lwakwo lwamachina lwali nilwalibulukha.

³²Ndahenga, mana neyililisiakhwo, ne nenyoola obuchetsiyi khuko mbu;

³³Konakhwo butswa tsindoolo hatiiti, noho renjetsakhwo butswa hatiiti, kata wifumbeelelekhwo butswa amakhono hati khulwa okhuhuluukha,

³⁴ne obumanani bukhwitsakhwo bwangu shinga omunuuli, obutakha shinga omulwani owimanule ebimanulwa.