Read wanga TSINJELO 25 Bible Online

TSINJELO 25 - wanga bible

TSINJELO 25

¹Tsino nitsio tsinjelo tsindi tsiomuruchi Solomoni, tsiabemilisi bomuruchi Hezekia wa Yuda bahandika.

²Noluyali khu Nyasaye okhubisa amakhuwa, nebutswa noluyali khubaruchi okhukhabilisia amakhuwa.

³Shinga olwa likulu lili ikulu muno, khandi shinga olwa eshialo shili eshiyinikhu muno, nolwa amapaaro akomuruchi kalanyala okhukhabilisibwa ta.

⁴Yinia ebindu ebibi ebili mufetsa, mana omwiranyi aleranyamwo eshindu eshilayi.

⁵Yinia abebaali abamayanu khumuruchi, ne oburuchibwe bularalila mubulunjishi.

⁶Olechinguula omwene imbeli womuruchi ta, kata olasinjila mubwikhalo bwabandu aboluyali ta,

⁷okhuba nobulayi akhuboolelwa mbu, “Sita hano,” okhushila okhwishibwa hasi imbeli wabandu aboluyali. Aka olutsi netsimonitsio omwene,

⁸shiolanguha okhukareera mushina tawe. Okhuba wakhakhola shiina olunyuma, lwowashio akhukhulolesia iwe okhuba oweshikha?

⁹Ninuba nimurambana nowashio, mukaasie omulembe abeene khubeene, ne olarumbula elwanyi libiso liomundu undi ta,

¹⁰okhuba buli mundu oulila mbu shionyala okhubisa libiso ta, alakhufimbia omurwe, mana ifwoyo imbi yilatsiililila okhubaho.

¹¹Likhuwa eliboolwa khubise ebikhoyile, lili shinga itsahabu eyirenjekhwe khushikaye eshieifetsa.

¹²Okhuhalabila omundu omurecherefu, khuli shinga ingaka yeitsahabu, noho ebimili bieitsahabu inzeleleshe.

¹³Shinga lwomunyiri kusangasinjia munyanga tsiomubasu, nolwa omurumwa omwisiikwa asangasinjia oyo oumurumile, okhuba asakulusinjia omwoyo kwomwamiwe.

¹⁴Omundu ousuubisinjia okhuhaana eshindu, ne nalahaana ta, ali shinga amaleesi nende omuyeka ebihutsa nibilareera ifula ta.

¹⁵Okhwisimilisia oluhoono olurambi, khunyala okhukhola omuruchi akhurecheresie, nalwo olulimi oluhooya lutubulanga eshikumba.

¹⁶Nonyoola obuushi, olie obukhuhela, nebutswa wakhalia wabiririra mana nobusala.

¹⁷Shiolanala okhucheniha owashio buli shise tawe, wakhamuchoonyia mana yakhusila.

¹⁸Omundu ouchikhanga owashie butswa, ali shinga eshimanulwa shieshikong'o noho olukanga noho olusele olumemu lwobuyingo.

¹⁹Okhwisika omundu oulali omwisiikwa ta, khunyanga yamanyakhano, khuli shinga okhuteema okhulia neliino elifinishe noho okhuchenda neshilenje eshiafunikha.

²⁰Okhwimbila omundu womwoyokwe kusinyishe, khuli shinga okhufwalula tsingubo khunyanga eyomunyiri, noho shinga okhusiisa omunyu mwikonzo.

²¹Omusukuwo naba nali inzala omuhelesie eshiokhulia alie, ne naba nalibwa obuloho, omuhelesie amaatsi anywe.

²²Nokhola orio, olamukhola afimbwe omurwe, naye OMWAMI Nyasaye alakhurunga omurungo.

²³Omuyeka okuhutsa okhurula emasaba kureeranga ifula, nabwo obumoonyani bureeranga oburasi.

²⁴Nobulayi okhumenya mushisuli ikulu, okhushila okhumenya munzu nomukhasi owobusolo.

²⁵Shinga olwa amaatsi amanyifu kali khumwoyo okuhalashe, nolwa amakhuwa amalayi akarula mushialo eshiehale kali khubandu.

²⁶Omundu omulayi oufuchilila okhuloonda amakhuwa komundu omumayanu, ali shinga isebele eyituubuulilwe noho liyabo elirerwemwo obufwisi.

²⁷Shibuli obulayi okhulia obuushi obunji ta, kata okhwiyenyela oluyali omwene tawe.

²⁸Omundu oulanyala okhwiruka omwene ta, ali shinga litaala elibula olukoba olwa liseerwa