Read wanga TSINJELO 26 Bible Online

TSINJELO 26 - wanga bible

TSINJELO 26

¹Oluyali oluhebwa khumuyingwa shilumukhoyela tawe, luli shinga ling'ong'ong'we mutsinyanga tsieshimiyu noho ifula mutsinyanga tsielichesa.

²Eshilaamo eshiobubi shishinyala okhukhutiila nolakwanile okhushinyoola tawe, shili butswa shinga amanyonyi akapulukha nikaboyokana, nikalayela hasi ta.

³Olukhoba lunywekhanga ifarasi, nalio lihana liboyungwa mumoolu keisishili, nalwo olusaala lunywekhanga omukongo kwomuyingwa.

⁴Shiolakalusia lireebo liomuyingwa mubuyingwa tawe, nebutswa wesi wakhaba butswa shinga omuyingwa tsana oyo.

⁵Okalusie lireebo liomuyingwa okhuloondana nobuyingwabwe, kho aleshe okhwilola mbu nomuchesi.

⁶Okhuruma omuyingwa okhuyila oburume, khuli shinga okhwirema eshilenje, noho okhwisalisia omwene.

⁷Oluchelo oluboolwa nomuyingwa, luli butswa shinga ebilenje biomulema ebielelile.

⁸Okhwitsoomia omuyingwa, khuli butswa shinga okhuboha lichina mumburusi.

⁹Omuyingwa outeemanga okhuboola oluchelo, ali butswa shinga omumeesi outeemanga okhurusia lihwa mumukhonokwe.

¹⁰Ouhandikanga omuyingwa yesi oubira noho omumeesi emilimo, ali butswa shinga omulasani wobuyingo oulasalasa butswa tsiseletsie nasalisia abandu boosi.

¹¹Shinga olwa imbwa yikalukhanga okhukhomba amasale kayo, nolwa omuyingwa akalushilanga okhukhola obuyingwabwe.

¹²Omuyingwa muno nomulayi okhushila, omundu yesi owipaarangakhwo omwene mbu nomuchesi ne nalali omuchesi tawe.

¹³Omundu omukara alanjilisinjia naboola ari, “Italanyi yili khumuhanda! Italanyi yili khunjila!”

¹⁴Shinga omuliango olwa kushiukhanilanga khubupata bwakwo, nolwa omukara yesi ashiukhanilanga khushitalishie.

¹⁵Omukara aretsanga omukhonokwe khushiokhulia, mana atofula okhukureera khumunwa.

¹⁶Omukara yelolanga omwene okhuba omuchesi muno, okhushila abandu musafu abakalusia likalusio muburechelefu.

¹⁷Omubiri owitsokanga mubusoolo obulali obubwe ta, ali shinga omundu outiilanga eshirwi shieimbwa eyibira.

¹⁸Shinga olwa omulalu alasa ebitseso biomulilo noho tsisele tsiobuyingo,

¹⁹nolwa ali omundu oukatia owashie, mana aboola ari, “Ekholilenjekhwo butswa omubayo!”

²⁰Tsikhwi nitsibulaho, omulilo kusimanga, ne ebimoonyo nibibulaho, obusoolo buhwetsanga.

²¹Shinga olwa amaanda, noho tsikhwi bibwananga omulilo, nolwa omundu omurasi oubwananga lisoolo ali ario.

²²Amakhuwa akomundu omumoonyi kali shinga ebironje ebinulu, kenjililanga elala okhuula mumwoyo mukari.

²³Omunwa omurerere nende amakhuwa amamayanu, kali shinga eshilonje shielitoyi eshiabakhwakhwo ipala.

²⁴Omundu oweisila abisanga isilaye namakhuwa amanulu, nebutswa abikhanga obukaati mumwoyokwe,

²⁵naboola amakhuwa amalayi, shiolamusuubilila tawe, okhuba omwoyokwe kwitsulemwo isila.

²⁶Kata naba nafunikha isilaye eyo, obumayanubwe bulabakalwa habulafu imbeli wabandu.

²⁷Ouyaba obuko, alakwamwo omwene, naye ouserenjesia lichina, lilamukwakhwo omwene.

²⁸Ouboolanga obubeeyi, asilanga abachishilanga, nalwo olulimi olubeeyi lureeranga obusasishi.