Read wanga TSINJELO 27 Bible Online

TSINJELO 27 - wanga bible

TSINJELO 27

¹Oleyitsialila khu aka mukamba tawe, okhuba shiomanyile mbu yilaba inyanga yirie tawe.

²Lekha abandu bandi bakhwitsoomie, nebutswa iwe omwene tawe, lekha kata abacheni bakhwitsoomie, nebutswa shioleyitsoomia omwene tawe.

³Lichina nelisiro, nakwo omuyeshe nomusiro muno, nebutswa obusinyishi bwomuyingwa nobusiro okhushila biombi.

⁴Liruma nelilulu, khandi lisasinjia, nebutswa ounyala okhwifwila imbalikha niwiina?

⁵Nobulayi okhuhalabila omundu habulafu, okhushila okhumukhola okhupaara mbu wamuheela.

⁶Amakhupache komwitsawo kamanyisinjia mbu nomusuubilwa khwiwe, nebutswa okhufumbeelela khwomusukuwo nokhwobubeeyi.

⁷Owikure kata nomuha obuushi ne aloba, nebutswa oweinzala kata eshiokhulia eshilulu, neshimilamilu khuye.

⁸Omundu ouli ehale okhurula ingowe, ali shinga linyonyi elili ehale okhurula khushitsu shialio.

⁹Amafura kokhwibakha nende akeshing'ari bisangasinjia omwoyo, nebutswa amatinyu kasinyisinjia omwoyo.

¹⁰Shiolebilila omwitsawo noho omwitsa wa papawo tawe, nonyoola amatinyu, olelushila khumwikhowo mbu akhukhoonye tawe, omumenyaniwo nowobukhoonyi okhushila omwikhowo ouli ehale khwiwe.

¹¹Mwana wanje, obe omuchesi, mana osangasie omwoyo kwanje, kho mbu enyale okhumukalusia yesi oufukula.

¹²Omurecherefu alolanga amasila niketsanga mana yebisa, nebutswa omuyingwa atsilililanga butswa mana asalisibwa.

¹³Omundu niyetsuba imbeliwo okhuba omusingo khumurende, obukule eshifwaloshie, kho omukhole okhuusia eshiayetsubile khumurende eshio.

¹⁴Oyo oushesia omumenyaniwe nomwoyo omukhongo mumabwibwi, kalalolekha shinga eshilaamo shiobubi.

¹⁵Omukhasi wobusoolo ali shinga ifula yomutsichi.

¹⁶Okhumwikalila okhusoolana, khuli shinga okhwikalila omuyeka okhuhutsa, noho okhufumbara amafura kokhunyululukha mumukhono.

¹⁷Eshibia shiyakalanga eshibia shiashie naye omundu achetsiyiinjia owashie.

¹⁸Owachila omukhuyu alalia khubiamo biakwo, naye oukhalabanila omwamiwe obulayi, alanyoola oluyali.

¹⁹Shinga olwa wilolanga obwenibwo omwene mumaatsi, nolwa omwoyo kwomundu kuloleshelanga owashie.

²⁰Emakombe nende eshialo shiobusasishi, shibikuranga tawe, nolwa tsimoni tsiomundu tsilekuranga okhulola tawe tsili tsirio.

²¹Omulilo kutsienulanga ifeetsa, nakwo omulilo kwelirumbi kutsienulanga itsahabu, kho omundu achelungwa noluyalilwe.

²²Kata noswaka omuyingwa mushinu halala nende imele, shionyala okhumwahukhasia nobuyingwabwe tawe.

²³Omanyilisie obulayi shinga olwa ebiayobio bili, khandi olinde obulayi emirukochio;

²⁴Okhuba obuyinda shibubetsangaho inziayo ta, nalwo olusimbi shilubetsangaho khulwa tsinzibulo tsiosi tawe.

²⁵Olwa obunyasi buremwa nibuchingwa, nakwo omuboka nikulolekha, natsio tsifwa etsiomubikulu nitsibunjelesibwa,

²⁶nilwo olwa ebimeme bilakhuhelesia obukuya bwokhukaasia ebifwalo, natsio tsimbusi tsilakhuhelesia amapesa kokhukula omukunda.

²⁷Tsimbusitsio tsilakhuhelesia iwe nende abeinzuyo amabeele amanji, kata nende akahela abakholibo beshikhasi.