Read wanga TSINJELO 28 Bible Online

TSINJELO 28 - wanga bible

TSINJELO 28

¹Omumayanu yelukhanga kata olwa aba nalatafibungwa ta, nebutswa omulunjishi yomanga ikholo shinga italanyi.

²Lihanga elikhola induli lirukungwa nabaruchi abanji, nebutswa lihanga liba namaani khandi liralila, olwa lirukwa nomuruchi wobumanyilisi khandi owobumanyi.

³Omuruchi ousandinjia abatakha ali shinga ifula yomukhula eyisasinjia ebiokhulia biosi.

⁴Abakhayi bamalako, betsoominjia obumayanu, nebutswa abo abalindanga amalako bayingananga ninabo.

⁵Abamayanu shibamanyilisinjia obukhalachi bwa habwene ta, nebutswa abo abenamilanga OMWAMI Nyasaye babumanyilisilinjia elala.

⁶Nobulayi okhuba omumanani, ne niwichendelesia mushilongoole, okhushila omuyinda oumenyanga muburambatsanu.

⁷Omwana oulindanga amalako, nomuchesi, nebutswa oyo ouchendanga nende abalang'u, afimbinjia samwana omurwe.

⁸Oumeetanga obuyindabwe khulwokhurunjia injelesio nende inganga, abunjelesilinjia oyo oulolesinjia tsimbabasi khubamanani.

⁹Oyo oukhayanga okhuhulila amalako, kata amasaayoke nakeshisinyo butswa.

¹⁰Oyo outsuubanga omulunjishi okhukhola obumayanu, alakwa mubukobwe omwene, nebutswa ababula eshikha babishilwa obulaame obulayi.

¹¹Omuyinda yelolanga omwene okhuba omuchesi, nebutswa omumanani omuchesi alamanyilisia obulayi obuchesi obwo.

¹²Abalunjishi nibemekhwa khubifumbi bioburuchi, abandu bekhoyanga muno, nebutswa abamayanu nibemekhwa, abandu batsia okhwibisa.

¹³Oufunikhanga obumayanubwe shianyala okhukasa tawe, nebutswa owiyamanga obwonoonibwe nabulekha, alabeelwa tsimbabasi.

¹⁴Noweikhabi oyo ouriitsanga OMWAMI Nyasaye buli lwosi, nebutswa oyo outinyinjia omwoyokwe akwitsanga mumasila.

¹⁵Omuruchi omumayaanu ouruka abamanani nomubi shinga italanyi eyihoola noho itubu eyiseera.

¹⁶Omuruchi oubula obuchesi, abetsanga owokhusandia okhululu. Nebutswa oyo owasila akalali ka habwene ta, arukanga oluhoono olurambi.

¹⁷Omundu outulwa khulwa okhuratsia eshitsayi shiowashie, okhuula yelushile mushialo shindi amenyeyo okhuula okhufwa, ne omundu yesi alamuhabinakhwo tawe.

¹⁸Omundu ouchendanga mubukololofu alahonibwa, nebutswa ouchenda mutsinjila tsishiamu alakwa mubuko.

¹⁹Omundu yesi oulima omukundakwe alaba nebiokhulia ebinji, nebutswa oyo owachama amakhuwa amakhaya alaba nobumanani obunji.

²⁰Omundu omwisiikwa alanyoola tsikhabi tsinyinji, nebutswa oyo ouyuyukhana okhuba omuyinda shialachweya okhunyoola eshinyasio tawe.

²¹Shibuli obulayi okhukhola ebiela tawe, nebutswa abandu bandi bonoonanga kata khulwa okhubukula eshironje shiobusuma.

²²Omundu owokhwiyenyela ebindu ayuyukhananga okhuba omuyinda, nebutswa shiamanyanga mbu obumanani bulamwitsila bwangu tawe.

²³Omundu ouhalabila owashie alanyoola olukoosi olunji olunyuma, okhushila oyo ouhombelesinjia nolulimi.

²⁴Omundu yesi ounuula samwana noho nyinamwana eshindu shiosi shiosi, ne naboola mbu “Obwo shibuli obubi ta,” nomwitsa womunuuli.

²⁵Omulang'u abuusinjia lisoolo, nebutswa oyo owisikanga OMWAMI Nyasaye alayindila.

²⁶Omundu owisikanga amachesike omwene nomuyingwa, nebutswa oyo owichendelesia mubuchesi alahonibwa.

²⁷Omundu ouhelesinjiakhwo omumanani eshindu shialatamba eshindu tawe, nebutswa oyo oukoyokoyinjia alanyoola eshilaamo shiobubi.

²⁸Omumayanu niyemekhwa okhuruka, abandu belukha nibebisa mushialo shindi, nebutswa omumayanu oyo nafwa, abalunjishi bemeeteekha.