Read wanga TSINJELO 29 Bible Online

TSINJELO 29 - wanga bible

TSINJELO 29

¹Oyo ouhalabilwa buli lwosi, ne natsiililila okhuma omurwe, inyanga yindi alifunachilwa elala obulahona tawe.

²Abalunjishi nibaruka, abandu basangalanga, nebutswa abamayanu nibaruka, abandu bashenyanga.

³Omwana owaheela obuchesi, asangasinjia abebusibe, nebutswa ousanganga nabatamba asasinjia emianduchie.

⁴Omuruchi oukholanga obukhalachi bwahabwene aralisinjia eshialoshie, nebutswa oyo oubukulanga eshiomufusi asasinjia eshialoshie.

⁵Omundu oukatilisinjia owashie, arekanga omubero khubilenjebie omwene.

⁶Abandu abamayanu berekanga abeene nobwonooni bwabwe, nebutswa abalunjishi bembanga nibasaangaala.

⁷Abalunjishi bamanyilisinjia akakwanila abamanani nebutswa abamayanu shibakamanyilisinjia tawe.

⁸Abakokonyi babwananga induli mwitookho, nebutswa abachesi bahotselesinjia liruma.

⁹Omuchesi nayingana nende omuyingwa mushiina, omuyingwa atseshelelanga butswa nende okhunyekana nalehotselesia ta.

¹⁰Abaheela okhuratsia eshitsayi basiranga ababula eshikha, khandi bakhabanga okhwira abalunjishi.

¹¹Omuyingwa alolesinjia habulafu lirumalie, nebutswa omuchesi yekalilanga lirumalie.

¹²Omuruchi naba narechelesia obubeeyi, abakofube boosi balaba abamayanu.

¹³Omumanani nende owokhusandia abashie, bafwanananga mwikhuwa lino mbu, OMWAMI Nyasaye abahelesinjia bosi tsimoni tsiokhulola.

¹⁴Omuruchi nakhalachila omumanani eshiina habwene, oburuchibwe bularalila inziayo.

¹⁵Olusaala nende okhuhalaba bihaananga obuchesi, nebutswa omwana oulekhwa butswa alireerera nyinamwana eshifimbwa murwe.

¹⁶Abamayanu nibaruka, obumayanu bumeetekhanga mushialo, nebutswa abalunjishi bamenyangaho okhulola abamayanu abo nibasasikha.

¹⁷Ochetsiyie omwanawo, naye shialakhuhendia omwoyo ta, khandi alakhusangasia.

¹⁸Lihanga elibula obulakusi bwa Nyasaye, abandu shibabetsanga nomulembe ta, nebutswa noweikhabi omundu oulindanga amalako.

¹⁹Amakhuwa komunwa butswa shikakololosinjia omukhalabani ta, okhuba kata narechelesia shiakaloondanga tawe.

²⁰Ololangakhwo omundu ourimukhanga mukhuboola? Omuyingwa nomulayi okhushila omundu oyo.

²¹Omundu outembelesinjia omukholiwe okhurula mulwanalwe, mukhumalilikha, omukholi oyo alilia obulaame bwemianduchie.

²²Omundu owokhusinyikha bwangu abusinjia lisoolo, naye oweliruma akholanga obwonooni obunji.

²³Okhwichinjimisia khwishinjia omundu hasi, nebutswa owomwoyo kwokhwituutuyia alanyoola oluyali.

²⁴Ousanganga nende omundu omwifi, yesalisinjia omwene; aulilanga eshilaamo eshibi eshia oyo oukholeelwe ebiela ne shiaboolakhwo likhuwa ta.

²⁵Okhuria abandu bandi nomureko khwiwe omwene, nebutswa oyo owisikanga OMWAMI Nyasaye alaba nomulembe.

²⁶Abandu abanji bakhabanga okhuheelwa nomuruchi, nebutswa obukhalachi bwa habwene burulanga khu OMWAMI Nyasaye.

²⁷Omundu omushiamu neshisinyo khumundu omulunjishi, nebutswa omulunjishi neshisinyo khumumayanu.