Read wanga TSINJELO 3 Bible Online

TSINJELO 3 - wanga bible

TSINJELO 3

¹Mwana wanje, olebilila amechesio kanje tawe, nebutswa obiishe amalako kanje mumwoyokwo,

²okhuba amebaalo kanje kalameeta obunji bwemiyikachio, khandi kalakhukhola obe omuyinda.

³Shiolafuchilila obuheeli nende obwisiikwa biakhurulakhwo tawe, obibohe mwikosilio, khandi obihandiche mumwoyokwo.

⁴Mana olanyoola obukoosia nende ifuma indayi imbeli wa Nyasaye nende ewa abandu.

⁵Wisichenje OMWAMI Nyasaye nomwoyokwo kwosi, ne oleleeta khubumanyilisibwo omwene tawe.

⁶Witsulilenje OMWAMI Nyasaye mukoosi akokhola, naye alakololosia tsinjilatsio.

⁷Ne olelola omwene mbu oli omuchesi tawe, nebutswa orie OMWAMI Nyasaye, khandi wihanye okhurula khubumayanu.

⁸Nokhola orio, omubilikwo kulaba nobulamu obulayi, nako amakumbako kalasilikhwa.

⁹Ohelesinjie OMWAMI Nyasaye oluyali khulwa okhumuhaanila ebia khumianduchio, khandi nende ebia khubirongole biosi, ebia ebiamobio ebiomumukandakwo.

¹⁰Mana ebiachibio biletsulamwo imele, natsio tsineemotsio tsiletsulamwo idivai indoro.

¹¹ Mwana wanje, olalechelesia obuchetsiyi obwa OMWAMI Nyasaye ta, khandi olasinyishila okhuhalabakhwe tawe.

¹²Okhuba OMWAMI Nyasaye ahalabilanga abo abayaheela, shinga samwana omwana olwa ahalabilanga omwanawe wa yaheela.

¹³Nabeikhabi abo abanyoola obuchesi, nende abanyoola obumanyilisi.

¹⁴Okhuba inganga yabwo yishila eyeifeetsa, khandi yishila kata eyeitsahabu.

¹⁵Obuchesi nobulayi okhushila amachina kobukusi obukhongo, shibulaho eshindu shiosi eshia wikomba eshionyala okhuchelasia ninabwo tawe.

¹⁶Khumukhono kwabwo musaatsa buli nemiyika eminji, ne khumukhono kwabwo mukhasi buli nemiandu nende oluyali.

¹⁷Tsinjila tsiabwo netsiokhuchamisia, khandi tsitsitsanga ewomulembe kuli.

¹⁸Obuchesi nomusaala kwobulamu khu boosi ababuhandangakhwo, ne boosi ababuhandangakhwo nabeikhabi.

¹⁹OMWAMI Nyasaye yalonga omuse kweshialo khulwa obuchesi, khandi yakaasia likulu nobumanyilisibwe.

²⁰Khulwa obumanyibwe yakhola emichela nichiitsulamwo amaatsi, nako amaleesi nikakwisia ifula khushialo.

²¹Mwana wanje, handa khubuchesi obulayi nende khubumanyilisi, olabilekha biakhurulakhwo tawe.

²²Mana bilaba obulamu mumwoyokwo, khandi bilaba eshisiayo mwikosilio.

²³Mana olachenda khunjila nomulembe, khandi shiolesichiralakhwo eshilenjeshio tawe.

²⁴Olwa wikhala hasi shiolabakhwo noburi bwosi bwosi ta, khandi olwa wiyalisia hasi tsindoolotsio tsilaba tsindayi.

²⁵Shiolaria amatinyu aketsa masundusia ta, kata imbumbuyeka eyikhupa abamayanu tawe.

²⁶Okhuba OMWAMI Nyasaye alakhulinda, khandi shialakhulekha otiilwe mumubero tawe.

²⁷Shiolalekha okhukholela abandu amalayi, lwoba nonyalilwa okhubakholela tawe.

²⁸Shiolaboolela owashio mbu, “Tsia mana okalushe, ndalakhuhelesia eshia wenyanga mukamba,” lwoba nonyala okhumukhoonya mushise eshio tawe.

²⁹Shiolarecheshela owashio amabi, olwa muba nimumenyanga ninaye mumulembe tawe.

³⁰Shiolasoolana nowashio butswa ahalali shifune ta, olwa alakhukholeele obubi bwosi tawe.

³¹Shiolalolela abandu beinduli eshikhalikhali, kata okhulonda tsinjila tsiabwe tawe.

³²Okhuba abamayanu neshisinyo khu OMWAMI Nyasaye, nebutswa abalunjishi nabetsabe.

³³OMWAMI Nyasaye alaamilanga tsinzu tsiabandu abamayanu eshilaamo shiobubi, nebutswa alaamilanga tsinzu etsiabalunjishi tsikhabi.

³⁴OMWAMI Nyasaye akokonyelanga abakokonyi, nebutswa alolosinjia obukoosia khubetuutuyi.

³⁵Abachesi balinyoola oluyali, nebutswa abayingwa balinyoola eshifimbwa murwe.