Read wanga TSINJELO 30 Bible Online

TSINJELO 30 - wanga bible

TSINJELO 30

¹Tsino nitsio tsinjelo tsia Aguru omusiani wa Yake owokhurula Masa, omundu tsana yaboolela Utsieli nende Ukali ari; “Iwe Nyasaye, enjoonyile, mana enjoonyile, kho ndakhanyalilwa endie?

²Toto mwene isie endi omuyingwa, kata oulakhoyile okhulangwa omundu ta, shiendikhwo nobumanyilisi bwomundu ta.

³Eshili okhwekakhwo okhuba nobuchesi, khandi eshili okhumanyakhwo eshindu shiosi khu Nyasaye Omutakatifu.

⁴Niwiina owatikulukhakhwo natsia mwikulu mana khandi nakalukha hasi? Niwiina owafumbarakhwo omuyeka mufusi? Niwiina owabohakhwo amaatsi koosi mushiifwalo? Niwiina owaraho tsinzakho tsiosi tsiokhundulo khweshialo? Eliira liomundu oyo niwiina? Nalio eliira liomwanawe niwiina? Mboolelakhwo noba nomanyile!

⁵Buli likhuwa lia Nyasaye aboola libetsanga obwatoto Nyasaye niye eshikhumba shia abo abelushilanga muye.

⁶Shiolameeta likhuwa khu kaboolile tawe, nebutswa alakhuhalabila mana olanyoolekha noli omubeeyi.”

⁷Iwe Nyasaye, ekhusaba ebindu bibili bino, nochama obimbelesie neshili okhufwa:

⁸Shiolakhola okhuba omubeeyi noho omukaati tawe, olakhola okhuba omuyinda noho omumanani tawe; Umbelesie butswa ebiokhulia ebimbela.

⁹Nditsukhana ndaaba ninabio ebinji ndakhwikaana; nemboola mbu, “OMWAMI Nyasaye niwiina?” Noho ndaaba omumanani ndeeba, mana ndareera linyeko khu liiralio iwe Nyasaye wanje.

¹⁰Shiolachiikha omukholi khumwamiwe ta, omukholi oyo anyala okhukhulaama eshilaamo shiobubi, mana eshiina nishikhufwiila.

¹¹Baliho abandu abalaamanga abasabwe eshilaamo eshiobubi, khandi shibalaamilanga abanyinamwana tsikhabi tawe.

¹²Khandi baliho abandu abelolanga abeene okhuba abasiiyikhu, nebutswa shibasiiywa eshifwabwi shiabwe tawe.

¹³Nabo abandi baliho abelolanga mbu nabalayi muno, balechelesinjia buli eshia balola netsimooni tsiabwe.

¹⁴Baliho aba ameeno kabwe kamema shinga tsinganga, aba ameeno kabwe kamema shinga emibano.

¹⁵Likhukhuuni lili nabaana abakhaana babili, Bahabanga nibaboola mbu, “Mbelesia! Mbelesia!” Biliho ebindu bitaru ebilekuranga ta, nabio bine ebilaboolangakhwo mbu “Bimbelile” tawe.

¹⁶Nabio mbiebino, emakombe, inda yomukhasi omukuumba, liloba elileekuranga amaatsi, nende omulilo okulanyala okhusimibwa ta.

¹⁷Omundu oulechelesinjia samwana, noho ouchaayanga nyinamwana, tsingosia tsiakhatsomole tsimoonitsie, nako amakhookho nikalia tsimoni etsio.

¹⁸Biliho ebindu bitaru ebihuchisinjia, bine ebiandalanyala okhumanyilisia ta, mbiebino mbu,

¹⁹injila ya indutsu mwikulu, injila ya inzokha khulwanda, injila yeimeeli khunyaanza, nende eshikholanga omusaatsa okhuchama omukhasi.

²⁰Injila yomukhasi omuheyi yili yiri nanwa, aliitsanga niyeya omunwa hasi, mana aboola mbu, “Shiekholilekhwo libi liosi liosi ta!”

²¹Kaliho amakhuwa kataru akaresinjia eshialo, kaliho amakhuwa kane aka ndalanyala okhwisimilisilia ta,

²²kali mbu, omusumba owikhola okhuba omuruchi, omuyingwa ouli nende buli shindu shia yenya.

²³Omukhasi oulaheelwa ta, olwa atekha khandi omukhaana omukhalabani ounuula omukhasi wakholelanga omusaatsa namuteeshela.

²⁴Biliho ebilonje bine mushialo ebili ebituutu muno nebutswa nebichesi muno okhushila,

²⁵mbiebino mbu, tsindukusi, netsindeshele, nebutswa tsibunjelesinjia ebiokhulia biatsio mutsinyanga tsieshimiyu.

²⁶Amacheneli, koosi khandi netsisolo tsindeshele, nebutswa kombakhanga tsinzu tsiako mutsinyanda.

²⁷Tsisiche, tsibula omuruchi, nebutswa tsichendelanga mumikanda chiatsio.

²⁸Amabiakala, onyala okhutiila elala mumukhono, nebutswa onyala okhukanyoola mutsinzu tsiabaruchi.

²⁹Biliho ebindu bitaru ebieinjenda yabio yinjamisinjia, biliho ebindu bine ebieinjenda yabio neyokhuchamisia,

³⁰Italanyi, niyo yamaani okhushila tsisolo tsiosi, ne khandi shiyiritsangakhwo isolo yindi tawe.

³¹Itaywa yolukungu, imbusi ikhole nende omuruchi niyemilile abandube.

³²Noba noli omuyingwa mana niwichinjimisiye omwene, noho nolosiyenje okhukhola obumayaanu, olaboolakhwo likhuwa tawe.

³³Okhuba okhusatsa amabeele mushimuka khureeranga amafura, nakhwo okhuborola eshiulu khureeranga amalasile, kho okhuyakula liruma khureeranga obusoolo.