Read wanga TSINJELO 31 Bible Online

TSINJELO 31 - wanga bible

TSINJELO 31

¹Tsino nitsio tsinjelo tsiomuruchi Lemweli wa Masa, etsia nyina yamwechesia naboola ari,

²Ekhuboolele shiina mwana wanje? Ekhuboolele shiina omwana wa munda yanje Ekhuboolele shiina omwana wa ndareeba okhurula khu Nyasaye.

³Shiolamalila amaaniko khubakhasi, noho khu abo abasasinjia abaruchi tawe.

⁴Iwe Lamweli, shikali habwene abaruchi okhunywa idivai ta, kata abaruchi okhwikomba okhunywa amalwa amalulu tawe.

⁵Okhuba banyala okhunywa, ne nibetsukhana nibebilila akamalile okhukhalakwa mushina, nende okhushiamia obukhalachi bwa abo boosi abasandibungwa.

⁶Helesia oufwitsanga amalwa amalulu, nayo idivai khubandu abanyakhananga obutinyu.

⁷Lekha banywe bebilile obumanani bwabwe, khandi baleshe okhwitsulila obutinyu bwabwe.

⁸Olomalome khulwa abo abalanyala okhulomaloma khulwabwe ta, olomalome khulwa okhuterera ababisandu.

⁹Olomalome khulwa okhukhalaka amakhuwa habwene, oterere kabamanani nende abatakha.

¹⁰Omukhaye omulayi, wakhamunyoola heena? Nomulayi muno okhushila kata amachina akobukusi.

¹¹Omwoyo kwomusaatsawe kumwisikanga, ne omusaatsa oyo shialatakhakhwo inganga tawe.

¹²Akholelanga omusaatsawe oyo amalayi, nalamusalisia ta, amukholelanga ako mutsinyanga tsiobulamubwe tsiosi.

¹³Akhabanga obuusi nende ikitani, mana namakhonoke akhola emilimo neshinani.

¹⁴Omukhasi oyo ali shinga tsimeli tsiabakhala areeranga ebiokhuliabie okhurula ehale.

¹⁵Abukhanga obukwe nibusheba, mana akasilia abomunzumwe ebiokhulia, khandi akabilanga abakholibe abeshikhaana emilimo.

¹⁶Alambuulanga omukunda mana akukula, Arakaanga omukunda kwemitsabibu noluchesi lwamakhonoke omwene.

¹⁷Akholanga emilimo namaani, mana atinyia amakhonoke.

¹⁸Amanyilisinjia obulayi mbu obukhalabwe nobweinganga, akholanga emilimo okhuula mushilo.

¹⁹Akasinjia obuusi namakhonoke omwene, mana anaba ebifwalobie omwene.

²⁰Nomuhaani khu abamanani, nende khu abatakha.

²¹Shiahendanga olwa itsaluchi yitsa khubeinzuye ta, okhuba abeinzuye boosi befwala ebifwalo biobutundumu.

²²Yenabilanga omwene ebiokhwifunikha, Ebifwalobie bianabwa khu ikitani indorotoro khandi iranzayi.

²³Omusaatsawe wamanyikha mushina shiabakofu, abukulanga obwikhalobwe mushikhalo shia abakhulundu beshialo.

²⁴Omukhasi oyo anabanga ebifwalo biikitani nabikusia khu abobukhala, khandi ayililanga abobukhala emishipi.

²⁵Amaani nende oluyali nibio ebifwalobie, khandi asangalilanga tsinyanga tsitsanga.

²⁶Aboolanga nobuchesi, ne olulimilwe luhaananga amechesio keshisa.

²⁷Ahenjelesinjia obulayi tsinjila etsiobulamu bwabeinzuye, khandi shialitsanga ebiokhulia biobukara tawe.

²⁸Abaanabe babukhanga nibamulanga mbu oweikhabi naye omusaatsawe yesi khandi amwitsoominjia naboola ari:

²⁹“Abakhasi abanji bakholanga amakhuwa amalayi muno, nebutswa iwe okholile amalayi muno okhushila boosi.”

³⁰Iriisi neyokhukatia, nalio likoondo lilayi lihwetsangaho, nebutswa omukhaye ouriitsanga OMWAMI Nyasaye, akhoyile okhwitsoomibwa.

³¹Muhelesie omurungo kwemilimo chiamakhonoke, nachio emilimochie chimureerere oluyali mushina shiabakofu.