Read wanga TSINJELO 4 Bible Online

TSINJELO 4 - wanga bible

TSINJELO 4

¹Baana banje, murecheresie obuchetsiyi bwa senywe, khandi mureche eshirwi kho munyoole obumanyilisi.

²Okhuba emwibaalilanga amakhuwa amalayi, ne mulalekha aka emwechesinjia tawe.

³Olwa ndali omwana wa papa, khandi omuheelwa wamama,

⁴papa yanzechesia niyamboolela ari, “Mwana wanje, otinye khumakhuwa kanje nomwoyokwo kwosi, khandi otiile amalako kanje, ne olabaho mwoyo.

⁵Onyoole obuchesi, khandi onyoole obumanyilisi, olebililakhwo kata okhushiukhana, okhurula khumakhuwa aka ekhuboolelanga kano tawe.

⁶Shiolalekhakhwo obuchesi ta, nabwo bulakhutetsa, khandi bulakhulinda obulayi.

⁷Obuchachilo bwobuchesi mbwobuno mbu; Onyoole obuchesi, ne nonyoola eshindu shindi shiosi, onyoole obumanyilisi.

⁸Oheele obuchesi, nabwo bulakhuchinguula. Obufumbelele, nabwo bulakhureerera oluyali.

⁹Bulakhufwala olusimbi lwolukoosi khumurwekwo, khandi bulakhufwala olusimbi lweing'oono.”

¹⁰Mwana wanje, rechelesia mana ohulile amakhuwa kanje, ne emiyika chiobulamubwo chilaba eminji.

¹¹Ndakhwechesiye injila eyobuchesi, khandi ndakhwimiliile mutsinjila tsingololofu.

¹²Olwa ochenda ebilenjebio shibilekalilwa tawe, khandi niwilukha shiolesichirala tawe.

¹³Otinye khumebaalo kobuchesi, olakalekha ta, okalinde obulayi okhuba nibwobulamubwo.

¹⁴Shiolatsiakhwo khunjila ya abamayaanu ta, kata olachenda khunjila ya abonooni tawe.

¹⁵Wikwenye okhurula khunjila eyo, olachiloonda ta, oshiukhane okhurula khuyo notsia butsia.

¹⁶Abandu abamayaanu shibanyala okhwiyalisia nibashili okhukholakhwo eshindu eshibi tawe. Tsindoolo shitsibayilanga nibashili okhukhola omundu okhwisichirala tawe.

¹⁷Okhuba obumayanu nishio eshiokhulia shiabwe, ne induli niyo idivai yabwe.

¹⁸Nebutswa injila yabalunjishi yili shinga obulafu bwomumabwibwi, obutsiilililanga okhwakha nibumeetekha okhuula mushiteere.

¹⁹Nebutswa injila yabamayaanu yili shinga eshilima eshikhongo, shibamanyanga eshibesichirasia tawe.

²⁰Mwana wanje, hulila amakhuwa kanje, reka eshirwishio khutsinjelo tsianje.

²¹Shiolakalekha karula imbeliwo ta, okabishe mumwoyokwo.

²²Okhuba niko obulamu khwabo abakanyoolanga, khandi kasilikhanga emibili chiabwe chiosi.

²³Olinde omwoyokwo neshinani shiosi, okhuba tsisebele tsiobulamu tsifitukhanga okhurula mukwo.

²⁴Shiolabakhwo ahambi namakhuwa kobubatsa ta, khandi obubooli obushiamu bube ehale ninawe.

²⁵Tsimonitsio tsihenjenje shilunji imbeliwo, nabio ebisichebio birangaalenje imbeliwo.

²⁶Ochende shilunji khunjilayo, mana tsinjilatsio tsiosi tsilaba tsindayi.

²⁷Shiolashiukhanakhwo okhutsia khumukhono omusaatsa noho omukhasi ta, ne eshilenjeshio shilabakhwo ahambi nobumayanu tawe.