Read wanga TSINJELO 6 Bible Online

TSINJELO 6 - wanga bible

TSINJELO 6

¹Mwana wanje, noba niwetsubila owashio eshindu, noho niwasuubisia owashio,

²kho omanye mbu, weboha nolulimilwo, khandi watilwa namakhuwa komunwakwo.

³Kho mwana wanje, omanye mbu oli hasi wobunyali bwowashio oyo, nebutswa khulwa okhwihonia okhole lino: otsie khumundu oyo bwangu, omusaaye akhulekhuule.

⁴Shiolafuchilila tsimonitsio okhukona tsindoolo, noho kata okhurenjetsa tawe.

⁵Wihonokosie okhurula mumubero okwo shinga olwa eshitsusu, noho linyonyi lihonokosinjia okhurula khumuyiimi.

⁶Iwe ouli omukara! Lolela khu tsindukusi, Lola shinga olwa tsimenyanga mana ochetsihale.

⁷Shitsilikhwo nende omwimilisi, kata omwami noho omuruchi tawe;

⁸nebutswa tsiibishilanga ebiokhulia biatsio mutsinyanga tsieshimiyu, khandi tsiikhung'asilinjia ebiokhulia biatsio mutsinyanga tsielichesa.

⁹Iwe omukara, olatsiililila okhuba mundoolo okhuula liina? Ne olabuukha liina okhurula mundoolotsio?

¹⁰Oboolanga mbu, “Lekha ndiyalisiekhwo butswa hatiiti! Lekha ndiifumbelelekhwo amakhono mana ehuluushekhwo hatiiti.”

¹¹Obumanani bulakhwitsakhwo shinga omunuuli, khandi obutakha shinga omundu wokhuyaaya.

¹²Omundu oubula inganga khandi omumayaanu, achenda chendanga naboola amakhuwa kobukoyanu.

¹³Atemateminjia tsimonitsie nasakala nebilenjebie, khandi niyebaala netsinzalatsie.

¹⁴Buli lwosi apaaranga amakhuwa amabi naloosia akobumayanu, khandi achachinjia lisoolo buli habundu.

¹⁵Khulwa okhubela ako, amatinyu kalamukwila bwangu, khandi alasasikha mubwangu, ne shialahona ta.

¹⁶Biliho ebindu bisasaba ebia OMWAMI Nyasaye alenyanga ta, khandi biliho musafu ebili eshisinyo khuye:

¹⁷mbu okhuhenga okhwa isunga, olulimi olubeeyi, amakhono akaraatsinjia eshitsayi shioubula eshikha,

¹⁸omwoyo okurechekhanga amakhuwa amamayanu, ebilenje ebianguhanga okhwilukha okhukhola amabi,

¹⁹omuloli omubeeyi khandi ouboolanga akobubeeyi, nende oyo oumitsanga inzoka mubashie.

²⁰Mwana wanje, otiile amebaalo aka isie papawo ekhuboolela, ne olebilila amechesio ka mamawo tawe.

²¹Okabishe buli lwosi mumwoyokwo, khandi okabohe mwikosilio.

²²Amechesio ako kalakhwimilila lwochenda, kalakhutetsa olwa wiyalisia, khandi kalakhwibaalila lwoba noli meeso.

²³Okhuba amalako ako niyitaha, nako amebaalo ako nobulafu; Okhuhalabilwa khwokhukololosia ebiima niyo injila yobulamu.

²⁴Bulakhutetsa okhurula khumukhasi omumayanu, khandi bulakhuhonokosia khululimi lwokhuhombelesia, olwomukhasi omuheyi.

²⁵Shiolekombakhwo mumwoyokwo likondolie lilayi ta, khandi olafuchililakhwo okhutematemia okhwebisichebie tawe.

²⁶Omurungo okwomukhasi omutamba nomukaate butswa, nebutswa omurungo kwomukhasi wabeene nomusaatsa okhukosia obulamubwe bwosi.

²⁷Omundu anyala okhuchiinga omulilo khushilifushie, ne ebifwalobie nibilayia ta?

²⁸Omundu anyala okhuseena khulianda liomulilo eliang'aalale, ne amalaaroke nikalayia ta?

²⁹Nolwa kali khumusaatsa oukona nomukhasi owabeene; Omusaatsa yesi oukhola ario, okhuula anyoole eshinyashio.

³⁰Abandu shibachayanga omwifi naba niyeba khulwa inzala tawe.

³¹Nebutswa naba natiilwa okhuula arunje akhandi musafu, khandi anuulwe emiandu chiosi echali ninachio munzuye.

³²Nebutswa omusaatsa ouheya nomukhasi wabeene, shiali namachesi tawe. Omusaatsa oyo yeyiranga omwene.

³³Alanyoola amafumire nende eshifimbwa murwe, ne eshifimbwa murwe eshio shishilahwaho tawe.

³⁴Okhuba imbalikha yibusinjia liruma liomusaatsa, ne shialolesinjiakhwo tsimbabasi olwa aba namala eshikwoli tawe.

³⁵Shialafuchililakhwo omurungo kwosi, kata okhubukula eshiomufusi, kata olwa shiba eshikhongo tawe.