Read wanga TSINJELO 7 Bible Online

TSINJELO 7 - wanga bible

TSINJELO 7

¹Mwana wanje, otiile amakhuwa kanje, mana obiishe amalako kanje mumwoyokwo.

²Olinde amalako kanje mana olabaho mwoyo. Olinde amechesio kanje shinga lwolindanga indolelo yeimoniyo.

³Okabohe khutsinzalatsio, khandi okahandiche mumwoyokwo.

⁴Oboolele obuchesi ori, “Niwe omukhaana wefwe.” Nabwo obumanyilisi ori, “Niwe omwitsa wanje.”

⁵Mana bilakhulinda okhurula khumukhasi omuheyi, khandi bilakhuhonokosia okhurula khumakhuwa akokhuhombelesia akomukhasi omuheyi.

⁶Inyanga yindi ndahenjelela elwanyi mwitirisha lieinzu yanje, ndahenjelela elwanyi mumalobelo keinzu yanje,

⁷ne nendola abasiani abaraka abanji ababula obuchesi, nebutswa mulala khubo yali omuyingwa.

⁸Yali nachendanga nabiranga khunjila ahambi ahomukhasi oyo yamenya, yali nabiranga ahambi neinzu yomukhasi oyo.

⁹Yali khungoloobe eliuba niliyelanga, eshialo nishiilimanga.

¹⁰Mana omukhasi oyo niyetsa okhwakana ninaye, niyefwalile ebifwalo biomutamba, khandi nali namakhuwa kokhuhombelesia mumwoyokwe.

¹¹Yali omukhasi owoluyoka, khandi oubula tsisoni, owokhuchendachenda khumuhanda buli lwosi.

¹²Bulano ali khumihanda, bulano ali khushiiro, akoneshelanga buli khumasanganjira.

¹³Mana omukhasi oyo nafumbeelela nende okhutsunzuuna omuraaka oyo, ne namuhenga mumoni namuboolela ari,

¹⁴“Inyanga yino ehaanile omusango, leelo ndusiiye ebitsubo bianje.

¹⁵Kho bulano nditsile okhwakana ninawe, erulile okhukhukhaaba neshinani mana ekhunyoolile.

¹⁶Ndaalile eshitali shianje netsishuka tsiobukondo obulayi, eshialile netsishuka tsieikitani tsiokhurula Misiri.

¹⁷Enyululusiye eshitali shianje namalesi keshing'ari, amalesi ka manemane aka isubili, nende akomutalasini.

¹⁸Yitsa khukone halala okhuula okhushia, khwisangasie nikhuhulila obulayi.

¹⁹Omusaatsa wanje shialiho tawe, atsiile oluchendo lwehale.

²⁰Abukule amapesa amanji natsia ninako, ne shialachelela ta okhuula hakari womwesi kuno.”

²¹Kho omukhasi oyo namuselela namakhuwake amalayi, mana omuraaka oyo nofuchilila.

²²Bwangu bwene omuraaka oyo namuloondakhwo, natsia ninaye shinga ing'ombe eyitsia okhusinzwa, noho shinga eshitsusu eshinjila mulurimba.

²³Shiyamanyakhwo mbu elo lilabukula obulamubwe bwosi ta, okhuula olwa yetsa okhwinyoola nali shinga oufumirwe nobuyingo mushilifu, nali shinga linyonyi elitililwe mushireko.

²⁴Bulano mwana wanje, oreche eshirwi, ohulile amakhuwa akekhuboolela.

²⁵Shiolafuchililakhwo omukhasi shinga oyo yakhwimilila mutsinjilatsie ta, kata olachendachenda mutsinjilatsie ta.

²⁶Okhuba omukhasi oyo wamala okhukwisia hasi abasaatsa abanji, khandi abayeera nabanji muno, abalanyala okhubalikha tawe.

²⁷Inzuye niyo injila eyitsia emakombe, eyikholomokha niyitsia hasi mulifwa.