Read wanga TSINJELO 8 Bible Online

TSINJELO 8 - wanga bible

TSINJELO 8

¹Hulila! Obuchesi bulanjilisia obutinyu, obumanyilisi bulanjilisia nomwoyo omukhongo.

²Bulanjilisia nibuli khulukuku, ahambi neinjila, businjiile khumasanganjila.

³Bulanjilisinjia habilibwa biokhwinjila mwitookho, bulanjilisia nomwoyo omukhongo nibuli aha abandu benjililanga mwitookho nibuboola buri,

⁴“Inywe abandu boosi, ninywe abenanjilisinjia, omulango kwanje kuli khubandu boosi.

⁵Inywe abayingwa mweche okhuba noburechelefu, inywe ababula obuchesi munyoole obumanyilisi.

⁶Murecheresie okhuba akenzia okhumuboolela namakhuwa amalayi, Amakhuwa akarula mumunwa kwanje nakahabwene.

⁷Omunwa kwanje kulaboola obwatoto, ne obumayanu neshisinyo khwisie.

⁸Amakhuwa kanje koosi nakobwatoto, obubeeyi noho obubatsa shibilimwo tawe.

⁹Koosi namalunjishi khu oyo oumanyilisia, khandi akahabwene khu abo abali nobumanyi.

¹⁰Mubukule amebaalo kanje, mushilenje shiokhubukula ifeetsa, khandi mubukule obumanyi, mushilenje shiokhubukula itsahabu inzeleleshe.

¹¹Obuchesi nobulayi okhushila amachina kobukusi obukhongo, ne ebindu biosi ebiawakhekomba shibinyala okhuchelasibwa ninabwo tawe.

¹²Isie obuchesi, emenyenga muburechelefu, khandi enyoolanga obumanyi nende obumanyilisi.

¹³Okhuria OMWAMI Nyasaye nokhusila obwonooni. Isie ndasila isunga nende okhwilola, nende injila yobwonooni, khandi ndasila imboola imbi.

¹⁴Endi namebaalo amalayi, nende obuchesi, endi nobumanyilisi nende amaani.

¹⁵Nisie oukhonyanga abaruchi okhuruka, khandi nisie ouchilanga abakhulundu abeshiina nibakhalaka akahabwene.

¹⁶Nisie ouchilanga abaami nibaruka, khandi nisie oukholanga abakhulundu okhuruka obulayi.

¹⁷Isie eheelanga abo abaheela isie, ne abakhaabanga isie neshinani baanyoolanga.

¹⁸Obuyinda nende oluyali endi ninabio, khandi endi nemiandu echiyindilanga nende obwale.

¹⁹Ebiamo bianje nebilayi okhushila itsahabu, kata okhushila itsahabu inzeleleshe, nayo inganga yanje yishila ifetsa inyushe.

²⁰Isie echendanga khunjila yobulunjishi, khadi enoondanga khutsinjila tsia habwene.

²¹Isie engabanga obuyinda khu abaheela isie, khandi nditsusinjia tsinzu tsiabwe nemiandu.

²²OMWAMI Nyasaye yaranjilila okhulonga isie, yanoonga khale nashili okhulongakhwo eshindu shindi shiosi.

²³Ndalongwa mutsinyanga tsiene tsiobuchaachilo, imbeli bwene, eshialo nishishili okhuchaka okhulongwa.

²⁴Ndebulwa tsisiba tsiomunyanza nitsishili okhubaho, kata tsisebele etsietsulamwo amaatsi nitsishili okhubaho.

²⁵Ndebulwa tsingulu nitsishili okhurebwaho, khandi ebikulu nibishili okhulongwa.

²⁶Olwa Nyasaye yali nashili okhulonga eshialo nende emikunda chiashio. Olwa yali nashili kata okhubukula liloba liokhushialo.

²⁷Isie ndaliho olwa yakaasia likulu mubwikhalo bwalio, olwa yabambula eshialo khunyanza.

²⁸Olwa yaralisia amaleesi mwikulu, olwa yalonga tsisiba tsieinyanza.

²⁹Olwa yaraho olwakho lweinyanza, kho mbu amaatsi kayo kalasiila okhubura aha yakalaka tawe. Olwa yaraho omusinji kweshialo.

³⁰Ndalinji ninaye shinga omukholi omusitsa, ndamuchamisinjia buli nyanga, khandi ndasangalanga buli lwosi imbeliwe.

³¹Ndasangalilanga eshialo nende abamenyamwo boosi, khandi ndekhoyelanga oluyia lwabandu.

³²Bulano, abaana banje murecheresie, nabeikhabi abalondanga tsinjila tsianje.

³³Recheresie amebaalo kanje, ne mulaba abachesi, shimulakaleshe tawe.

³⁴Noweikhabi oyo oumbulilanga isie, oubetsangaho meeso buli lwosi hamuliango wanje, nalindilila buli lwosi habwinjililo bwanje.

³⁵Okhuba ounyoola isie, anyoolile obulamu, khandi anyoola obukoosia okhurula khu OMWAMI Nyasaye.

³⁶Nebutswa abo abalaanyoola ta, besaaliisinjia abeene, khandi boosi abaasila isie, baheelanga okhufwa.”