Read wanga TSINJELO 9 Bible Online

TSINJELO 9 - wanga bible

TSINJELO 9

¹Obuchesi buumbaashe inzu yabwo, businjisiye tsisiilo tsiabwo musafu.

²Obuchesi businzile tsisolo tsielisabo, bumalile okhukaasia idivai, khandi bwalile imesa yabwo.

³Burumile abakhalabani babwo abeshikhasi okhutsia mwitookho, balanjilisia nibali habundu hachingukhu muno, nibaboola bari,

⁴“Buli mundu oubula obuchesi yetse hano!” Abayingwa bababoolela bari,

⁵“Yitse muliekhwo ebiokhulia bianje, khandi munywekhwo idivai yengaasiye.

⁶Lekhane nobuyingwa, mana mubeho mwoyo, muloonde khunjila yobuchesi.”

⁷Omundu yesi owechesia omukokonyi, yereereranga amanyeko, naye ouhalabila omumayanu yenyoolelanga imbala.

⁸Shiolahalabila omukokonyi ta, okhuba alakhusinyishila, nebutswa ohalabile omuchesi, ne alakhuheela.

⁹Wibaalile omundu omuchesi, naye alameeta okhuchetsihala, yechesia omundu omulunjishi naye aleemeeta obuchesi.

¹⁰Okhuba okhuria OMWAMI Nyasaye nibwo obuchaachilo bwobuchesi, ne okhumumanya oyo Ouli Omutakatifu nibwo obumanyilisi.

¹¹Okhuba okhubirila mwisie Obuchesi, olamenya tsinyanga tsinyinji, khandi emiyika chiobulamubwo chilemeeta.

¹²Okhuba noba noli nobuchesi, obuchesi obwo nobulayi khwiwe, ne noba omukokonyi, omwene olabwituukha.

¹³Omukhasi omuyingwa nowoluyoka, shiamanyile eshindu ta, khandi abula isoni.

¹⁴Yekhalanga hamuliango weinzuye, khandi yekhalanga khushifumbi habundu hachingukhu mwitookho.

¹⁵Mana alanjilisia abandu ababirangaho, abachoomile khumakhuwa kabwe abeene, naboola ari,

¹⁶“Yitse hano inywe ababula obuchesi!” Ne khubayingwa ababoolela ari,

¹⁷“Amaatsi kobwifi namalayi muno, ne eshiokhulia eshiibilwe shilimwo eshiuya eshilayi muno.”

¹⁸Nebutswa abayingwa abo shibamanyanga mbu abandu abenjilanga munzuye bafwitsanga ta, khandi, boosi abamala okhucheniha omukhasi oyo bulano bali hasi mushialo shiemakombe tawe.