Read wanga OMWIBAALI 1 Bible Online

OMWIBAALI 1 - wanga bible

OMWIBAALI 1

¹Akalondakhwo kano namakhuwa aka Omwibaali omuchesi, Omusiani wa Daudi owali omuruchi wa Yerusalemu.

²Omwibaali oyo yaboola mbu, Amakhuwa koosi namakhaya butswa, buli shindu neshikhaya. Koosi namakhaya butswa.

³Neinganga shiina yomundu anyoolanga okhurula khumilimo chiosi echiakholanga khushialo?

⁴Olwibulo lwitsaho, olwibulo luhwaho, nebutswa eshialo shitong'aho obulakalukhana ta.

⁵Eliuba lirula khandi eliuba liyeela, mana likalukha bwangu ewa likhoyile okhurulila khandi.

⁶Omuyeka kuhutsanga nikutsia emulambo, omuyeka kuhutsanga nikutsia emasaba, kubotokhana nikubotokhana mana kubotokhana nikukalukha khandi.

⁷Emichela chiosi chikholomokhanga nichitsukha amaatsi munyanza, nebutswa inyanza shiyitsulanga tawe. Amaatsi ako kakalukhanga ewa emichela chichachilanga, mana kachaaka okhukholomokha khandi.

⁸Buli shindu shichoonyinjia, okhuchoonya okhukhongo khwomundu yesi alanyala okhwinoosia tawe. Tsimoni tsiefwe shitsikuranga okhulola ta, kata amarwi kefwe shikanyalikhanga okhuhulila tawe.

⁹Akekholekhakhwo niko akalekholekha khandi. Akakholwakhwo niko akalakholwa khandi, shibulaho eshindu shiosi eshiyiakha mushialo tawe.

¹⁰Abandu baboolanga mbu, “Lola! Shino neshindu eshiyia.” Nebutswa shialinjiho khale muno, shialinjiho kata ifwe nikhushili okhwibulwa.

¹¹Abulaho owitsulilanga kekholekha khale, khandi abulaho mutsinyanga tsitsanga oulitsulila akekholekha mubise bino nende ebio tawe.

¹²Isie Omwibaali, ndali omuruchi wa Isiraeli mu Yerusalemu.

¹³Ne ndarakhwo omwoyo muno okhukhabilisia nerunilisia nobuchesi buli shindu eshikholekhanga khushialo. Okhurunilisia okhwo nomulimo omusiro okwa Nyasaye yakhutuukha.

¹⁴Ndalutsi koosi akakholungwa mushialo muno, ne emuboolela mbu, koosi namakhaya butswa. Kafwana butswa shinga okhuteema okhulondachilila omuyeka.

¹⁵Eshiamala okhushiama, shishinyala okhukololosibwa ta, ne eshibulaho, shishinyala okhubalwa tawe.

¹⁶Ndaboola mumwoyo kwanje endi, “Enyoolile obuchesi obunji okhushilakhwo omuruchi undi yesi owaranjilila isie okhuruka Yerusalemu. Endi nende obuchesi nende obumanyilisi obunji.”

¹⁷Ndarakhwo omwoyo okhumanyilisia obwahukhani obuliho hakari wobumanyilisi nende obuyingwa, obuchesi nende obulalu. Nebutswa ndanyoola khandi mbu kafwana butswa shinga okhulondachilila omuyeka.

¹⁸Okhuba obuchesi obunji bureeranga okhuhenda omwoyo, ne obumanyilisi obunji bureeranga eshibeela.