Read wanga OMWIBAALI 11 Bible Online

OMWIBAALI 11 - wanga bible

OMWIBAALI 11

¹Biikha amapesako mubukhala, mana olunyuma lwetsinyanga tsinyinji onyala okhunyoola inganga.

²Obishe emianduchio mubandu abanji muno shichila shiomanyanga amabi akalakhukwiila khushialo khuno tawe.

³Amaleesi niketsuulemwo amaatsi kakwisinjia ifula khushialo, khandi aha omusaala kuhenganga nikukwa, yibe emulambo noho emasaba niho aha kutong'anga nikukonile.

⁴Oyo oulindililanga omuyeka shialiraaka ta, naye oulindililanga mbu amaleesi katsie shialichesa ta.

⁵Shinga olwa olanyala okhumanya shinga omubili kwomwana kulongungwa munda yanyina ta, nolwa olanyala okhumanya ebikhole bia Nyasaye oukholanga buli shindu.

⁶Ohanye imwoyo mutsuli, khandi khungolobe ohanye, shichila shiomanyile eyineyikhule obulayi noho eyinayikhaywe okhukhula obulayi khutsio tawe.

⁷Toto mwene obulafu nobulayi, khandi okhulola obulafu bweliuba nobulayi muno.

⁸Osangalilenje buli omuyika kwomenyaho omulamu, ne kata nomenya emiyika eminji muno, witsulilenje wakhamale emiyika eminji mushiilima. Ne akakhekholeshe olunyuma namakhaya butswa.

⁹Inywe abaraka, mwikhoye muburaaka bwenywe. Musangaalenje olwa mushili ababuukha. Kholenje aka mwenya, khandi nimulonda obwikombi bwemioyo chienywe. Nebutswa mwitsulilenje mbu Nyasaye alimuyaasia mubuli likhuwa elia mukhola.

¹⁰Khulweshio olalekha eshindu shiosi shiakhuhendia omwoyo noho okhukhutsunia omubili ta, shichila olurakalwo nende obulamu bwosi obuloondakhwo neshikhaya butswa.