Read wanga OMWIBAALI 12 Bible Online

OMWIBAALI 12 - wanga bible

OMWIBAALI 12

¹Yitsulila omulonjiwo noshili omubuukha, tsinyanga nende emiyika chiamatinyu nichishili okhuula, olwa oliboola mbu, “Obulamu bwanje shibunjamisinjia ta.”

²Olwene olwo nilwo lwobulafu bweliuba, omwesi nende obwetsing'ining'ini bwakhamaliye ti, nako amaleesi keifula shikalirulakhwo tawe.

³Inyanga eyo nilwo olwa amakhonoko kakhulindanga kalitechesibwa, nabio ebilenjebio biamaani bilifwokoya. Ameenoko kakhabe matuutu akalanyala okhunyanya eshiokhulia ta, natsio tsimonitsio tsiakhamaliye ti, nitsilanyala okhulola obulayi tawe.

⁴Amarwiko kakhekale, shikalinyala okhuhulila oluyoka lwokhunjila tawe. Shiwakhanyalilwekhwo okhuhulila okhuhuma khwoluchina nilusia kata olwimbo nilwimbwa ta, nebutswa kata oluyoka lwokhwimba khwelinyonyi lwakhakhubuusie okhurula mundoolo.

⁵Wakharie okhunina ebisia ne okhuchenda khubilenje khwakhabe okhutinyu muno. Liswilio lilikwa tsimbutsi, ne shiwakhanyalilwe okhwikhwesa omwene ta, khandi shiwakhekombekhwo eshindu shiosi tawe. Khutsitsanga ewakhulihuluushila inziayo, mana okhwikhuula khulabaho khumihanda chiomumatookho.

⁶Omunyololo kweifetsa kulikhalikha, eshikaye shieitsahabu shilikwa hasi nishiatikha. Omukoye okuli hasebele kulikhalikha, nayo isiongo yamaatsi niyatikha.

⁷Emibili chiefwe chiakhakalushe khwiloba okhwa chiarula, nakwo omwoyo kwakhakalushe khu Nyasaye, owakuhaana khwifwe.

⁸Omuyaali aboola mbu, koosi namakhaya khandi namakhaya butswa.

⁹Khulwa okhubela Omuyaali yali omundu omuchesi, yatsiililila okhwechesia abandu akobuchesi. Yakhabilisia okhumanya obwatoto bwetsinjelo, mana natsikololosia habwene.

¹⁰Omuyaali yateema okhukhaaba amakhuwa kokhuhotselesia, nebutswa, aka yahandika kali kobwototo,

¹¹Amakhuwa kabachesi kali shinga tsisaala tsiamema tsiabaayi bekhoonyelanga okhwaya amakondi, natsio tsinjelo tsiakhung'asibwa halala tsili shinga eshikhongo eshiakhomwa obutinyu mwiloba. Tsinjelo etsio tsihaanwa nende Nyasaye, omwayi wefwe fwesi.

¹²Mwana wanje, likhuwa lindi liliho elia enzenya okhukhwibaalila mbu, okhuhandika ebitabu khubula eshiakamo tawe, ne okhusooma okhunji khuchonyinjia omubili.

¹³Bulano amakhuwa koosi kamalilwe okhuboolwa; akamalilisia ngakano mbu, orie Nyasaye mana olonde amalakoke, okhuba ako konyene niko akomundu akwanile okhukhola.

¹⁴Nyasaye aliyaasia amakhuwa koosi, kata akakholwa mabiswi, kata kabe amalayi noho amabi.