Read wanga OMWIBAALI 2 Bible Online

OMWIBAALI 2 - wanga bible

OMWIBAALI 2

¹Kho ndaboola mumwoyo kwanje endi, “Bulano lekha ndisangaasie, ndisangaasie omwene mubulamu.” Nebutswa ndanyoola ako koosi khandi kali butswa amakhaya.

²Nemboola mbu, okhutsekha nobuyingwa, ne okhwisangasia shikhukhureererakhwo amalayi koosi koosi tawe.

³Nenzimililwe nobwikombi bwanje bwokhunyoola obuchesi, ndalola mbu ndisangaasie omwene khulwa okhunywa idivai mana emanyilisie lichoomo liobusilu. Ndapaara mbu yino yinyala okhuba injila indayi muno yabandu banyala okhumenyelamwo obulamu bwabwe obuli obwimbichiti mushialo muno.

⁴Ndakhola amakhuwa amakhongo. Ndeyumbashila tsinzu khandi nindiraachila emikunda chiemitsabibu.

⁵Ndekaasilia emikunda nende ebikuri biokhuhulushilamwo, mana neraakamwo emisaala chiebiamo bietsimbia tsiosi.

⁶Ndeyabila amayabo kamatsi, kokhusama emisaala echio.

⁷Ndakula abasumba abanji abasaatsa nende abakhasi, khandi nimba nende abandi abebulilwa mwitaala lianje. Khandi nimba nende ebiayo ebinji nende tsing'ombe tsinyinji okhushilakhwo abo boosi abaranjilila isie okhumenya Yerusalemu.

⁸Ndekhung'asilia khandi ifeetsa nende itsahabu inyinji okhurula mumabikho kabaruchi nende aketsingongo. Abasaatsa nende abakhasi bembanga khulwa okhuusangasia, khandi ndali nende abakhasi ababiikha abanji abomusaatsa undi yesi yesi yakhekomba.

⁹Kho nemba omundu omukhongo okhushilakhwo abandu boosi abaranjilila isie okhumenya mu Yerusalemu, nabwo obuchesi bwanje nibutsiilila okhuba mwisie.

¹⁰Buli shindu shietsimoni tsianje tsiekombanga ndashinyoola. Shindayeyimakhwo obusangaali bwosi bwosi tawe. Ndasangaalila buli omulimo kwa ndali nindakhola, ne okwo nikwo okwali omurungo khulwa emilimo chianje chiosi.

¹¹Mana neyililisia ebindu biosi ebia ndali nekholile khandi shinga olwa ndali nenyakhane okhubikhola namani, ne nenyoola mbu koosi namakhaya butswa. Kafwana butswa shinga okhulondachila omuyeka, shikalikhwo neinganga yosi yosi khumundu mushialo tawe.

¹²Kho neshiukhana okhuyililisia khushisina shiobuchesi, obulalu nende obuyingwa. Nindireeba mbu, “Kho nishiina shiomundu oukalukha mushilenje shiomuruchi anyala okhukhola?” Anyala butswa okhukhola akamala okhukholwa.

¹³Mana ninyoola mbu, obuchesi nobulayi okhushila obuyingwa, shinga olwa obulafu buli obulayi okhushila eshilima.

¹⁴Omundu omuchesi alolanga ewa atsitsanga, nebutswa omuyingwa shianyala okhulola tawe. Ne kata kario ndanyoola mbu, obumalilishi bwomuchesi nende omuyingwa nibulala butswa.

¹⁵Mana nemboola mumwoyo kwanje mbu, “Akakwilanga omuyingwa, kalangwila siesi; kho neinganga shiina eya isie okhuba omuchesi muno?” Mana nemboola mumwoyo kwanje mbu, ako khandi koosi namakhaya butswa.

¹⁶Abulaho owitsulilanga omundu omuchesi khandi abulaho owitsulilanga omundu omuyingwa. Mutsinyanga tsitsanga, fwesi khwakhebililwe. Fwesi okhuula khwakhafwe, abachesi kata abayingwa!

¹⁷Khulweshio nenjaaya obulamu shichila akekholekhanga mushialo koosi kandeerera amanyakhano. Koosi namakhaya butswa, kali butswa shinga okhulondachila omuyeka.

¹⁸Ndasinyishila emilimo chiosi echia ndali nindanyakhana okhukhola mushialo, shichila ndamanya mbu okhuula endeshele owitsa okhukalukha mushilenje shianje.

¹⁹Ne niwiina oumanyile nikali mbu omundu tsana aliba omuchesi noho omuyingwa? Nebutswa ebindu biosi ebia ndanyakhana okhukhola nende biosi ebiandanyoola khulwa obuchesi bwanje nendi mushialo biliba ebibie. Ako koosi khandi namakhaya butswa.

²⁰Kho olwa ndayililisiakhwo khumilimo chosi echia ndakhola mushialo ndafwa omwoyo muno.

²¹Okhuba ebise bindi onyala okhukhalabana nobuchesibwo bwosi, nobumanyibwo bwosi nende obusitsa bwosi khulwa okhunyoola eshindu, ne olunyuma oshileshela omundu undi oulanyakhana okhukhalabana khulwashio tawe. Ako koosi khandi namakhaya butswa, khandi nobubi muno.

²²Okhuba nomurungo shiina kwomundu anyoolanga okhurula khumilimochie nende okhukhalabanakhwe khwosi mushialo?

²³Olwa oba noshiliho mwoyo, buli shiosi eshiokhola shishilikhwo neinganga ta, habula shikhureerera okhuheenda nende eshibeela. Kata mushilo omwoyokwo shikunyala okhwihotselesia tawe. Ako koosi khandi namakhaya butswa.

²⁴Libulaho lilayi khumundu elishila okhulia, okhunywa, nende okhusangalila emilimochie tawe. Ne kata kario, ndanyoola mbu kano koosi karulanga khu Nyasaye.

²⁵Okhuba nalali Nyasaye ta, wakhanyala orie okhuba neshindu shiosi eshiokhulia noho eshiokhwisangasia omwene?

²⁶Okhuba Nyasaye ahelesinjia omundu oumuchamisinjia obuchesi, obumanyilisi nende okhwikhoya. Nebutswa khumwonooni amuhelesinjia omulimo kwokhubunjelesia nende okhubikha kho mbu ebiabanyoolile abihelesia oyo oumuchamisinjia. Ako koosi khandi namakhaya butswa. Kafwana shinga okhulondachila omuyeka.