Read wanga OMWIBAALI 3 Bible Online

OMWIBAALI 3 - wanga bible

OMWIBAALI 3

¹Buli shindu shili neindukho yashio, khandi buli likhuwa elikholekhanga mushialo lili neshise shialio.

²Shiliho eshise shiokhwibulwa nende eshise shiokhufwa. Eshise shiokhuraaka nende eshise shiokhusiula.

³Eshise shiokhwira nende eshise shiokhuhonia. Eshise shiokhulikulula nende eshise shiokhumbakha.

⁴Eshise shiokhubeelela nende eshise shiokhusangaala. Eshise shiokhulila nende eshise shiokhushina.

⁵Eshise shiokhuchamana nende eshise eshilali shiokhuchamana ta[1]. Eshise shiokhutsunzuunana nende eshise eshilali shiokhutsunzuunana ta.

⁶Eshise shiokhunyoola nende eshise shiokhukosia. Eshise shiokhubiikha nende eshise shiokhusukuna.

⁷Eshise shiokhurandula nende eshise shiokhunaba. Eshise shiokhuboola nende eshise shiokhuholeela.

⁸Eshise shiokhuheelana nende eshise shiokhusilana. Eshise shiokhulwana nende eshise shiomulembe.

⁹Neinganga shiina yomukholi wemilimo anyoolanga okhurula mubukholibwe bwemilimo?

¹⁰Emalile okhulola omusiko omusiro kwa Nyasaye yara khubandu.

¹¹Yakhola buli shindu shibe eshilayi mushise shiashio. Khandi yahelesia abandu obuha bwokhumanyilisia amakhuwa akabira nende aketsanga, nebutswa shibanyala okhumanyilisia mubwitsulu eshise shikhoyeele khu buli shindu ta. Shiyakhuhelesia obwikombi bwokhumanya aka yakhola okhurula mukhuchaaka okhuula mukhumalilikha tawe.

¹²Emanyile mbu shibulaho eshindu shiosi eshilayi okhushila khubandu nishilali okhusangaala nende okhwitsaatsahasia abeene olwa bashiliho mwoyo ta.

¹³Fwesi khukwanile okhulia nende okhunywa nikhusangaalila emilimo chiefwe chiosi. Shichila eshio nishio eshihaanwa shia Nyasaye.

¹⁴Emanyile mbu buli shindu eshia Nyasaye akholanga shilabetsangaho inziayo. Shibulaho eshindu shindi eshinyala okhumeetwakhwo noho okhuyinibwakhwo tawe. Nyasaye yakhola ario, kho mbu fwesi khumuritsenje.

¹⁵Amakhuwa koosi akekholekhanga bulano, noho akanakekholeshe kamala okhwikholekhakhwo. Nyasaye akholanga amakhuwa ako okhwikholekha khandi.

¹⁶Okhumeetakhwo, ndalola mbu, mushialo muno, habundu hobukhalachi bwahabwene bukhoyile okhuba, obumayanu nibwo obuliho, khandi habundu hobulunjishi bukhoyile okhuba obumayanu nibwo obuliho.

¹⁷Ne nemboola mumwoyo kwanje endi, “Nyasaye aliyaasia abalunjishi nende abamayanu nashilala, shichila buli likhuwa nende buli shindu, bilikholekha khushise shiabio.”

¹⁸Khandi nimboola mumwoyo kwanje endi, “Nyasaye ateemanga abandu kho bamanye mbu, bali shinga tsisolo.

¹⁹Okhuba akekholekhanga khubandu niko akekholekhanga khutsisolo. Shinga tsisolo olwa tsifwitsanga khandi nolwa abandu bafwitsanga bario. Biosi nebilonje ebihelanga omuuya. Omundu shialikhwo obulayi okhushila isolo ta, shichila obulamu khubio biosi neshikhaya butswa.

²⁰Biosi bitsitsanga habundu halala yaho, biosi birulanga mulufu khandi bikalukhanga mulufu.

²¹Niwiina oumanyile nikaba mbu, roho womundu atsitsanga ikulu, nayo eya isolo yitsia hasi mwiloba?”

²²Khulweshio ndalola mbu eshindu eshilayi shiomundu anyala okhukhola, nokhusangaalila emilimochie, shichila okwo nikwo omukabokwe. Abulaho ounyala okhumumanyia akalikholekha olunyuma lwokhufwakhwe.