Read wanga OMWIBAALI 4 Bible Online

OMWIBAALI 4 - wanga bible

OMWIBAALI 4

¹Khandi ndalola obusandibwi bwosi obukholungwa mushialo muno. Abandu abasandibungwa balilanga, ne abulaho oubahabinanga. Abulaho owakhanyalile okhubahabina shichila ababasandinjia bali nobunyali.

²Mana nemboola mumwoyo kwanje mbu, abafu abamala okhufwa bali obulayi okhushila abo abashiliho mwoyo.

³Nebutswa abalikhwo obulayi muno okhushila abo boosi, nabandu abashili okwibulwa, abashili okhulolakhwo obubi obukholungwa mushialo muno.

⁴Khandi nimanya mbu, abandu bakholanga emilimo nomwoyo kwosi, shichila bali neimbalikha khubashiabwe. Nebutswa kano koosi khandi namakhaya butswa, kali shinga okhulondachilila omuyeka.

⁵Omuyingwa yefumbeelelanga amakhono nalakhola emilimo ta, ne inzala yimulumanga okhuula olwa afwa.

⁶Nobulayi muno obe ninabio bitiiti mumulembe, okhushila okhuba ninabio ebinji namanyakhano, bili butswa shinga okhulondachilila omuyeka.

⁷Khandi ndalola amakhuwa kandi akali amakhaya butswa mushialo.

⁸Omundu aliho oumenyanga yenyene. Shialikhwo nomwana omusiani noho kata omusiani wabwe ta, nebutswa akhalabananga emilimo buli lwosi, shiyekuranga obuyinda obwali ninabwo ta. Ne shiyereebangakhwo ari, “Niwiina owenyakhanilanga nindinyima okhwitsaatsahasia?” Kano koosi namakhaya butswa, khandi obwo nobulamu bwokhwikhupia eshibi.

⁹Abandu babili bashila mulala, shichila nibali halala bario bali nomurungo omulayi khulwa emilimo chiabwe.

¹⁰Mulala khubo niyetsukhana yakwa hasi, oundi aba alamukhoonya okhubuukha. Nebutswa omundu naba nali yenyene, ne nakwa, aba ali khubutinyu shichila abulaho oulamubuusia.

¹¹Khandi babili nibeyalisia halala, baba balatunduuma emibili. Nebutswa mulala yakhatunduuma arie omubili?

¹²Omundu nali mulala yenyene anyala okhuhulwa nomusukuwe, nebutswa nibali babili balakhoonyana mana bahule omusuku oyo. Omukoye okwabaswa tsinzaha tsitaru shikunyala okhukhalikha bwangu tawe.

¹³Omuraaka omutakha nebutswa omuchesi, nomulayi okhushila omuruchi omukofu omuyingwa oulafuchililanga okhwibaalilwa ta.

¹⁴Kata omuraaka oyo naba niyarula mumbohe noho naba niyebulwa omumanani mushialo shiabwe, anyala okhwemekhwa okhuba omuruchi.

¹⁵Ndayililisia mumwoyo kwanje khubandu boosi abamenyanga mushialo muno. Ne nenyoola mbu mubo, aliho omusiani omuraaka oulikalukha mushilenje shiomuruchi.

¹⁶Abandu abomuruchi oyo aliruka nabanji muno, nebutswa abalitsa olunyuma shibalisangalila owakalukha mushilenje shiomuruchi oyo tawe, kano koosi khandi namakhaya, kali butswa shinga okhulondachila omuyeka.