Read wanga OMWIBAALI 5 Bible Online

OMWIBAALI 5 - wanga bible

OMWIBAALI 5

¹Wilinde obulayi olwa otsia munzu ya Nyasaye. Nobulayi okhutsiamwo khulwa okhweka, okhushila okhutsiamwo okhumala emisango shinga abayingwa bakholanga. Okhuba shibamanyile mbu bakholanga obumayanu tawe.

²Oyililisinjie obulayi noshili okhuboola likhuwa liosi liosi, shiolatetekhana okhusuubisia okhuhaana eshindu khu Nyasaye tawe. Okhuba ye ali mwikulu, nawe oli mushialo. Khulweshio amakhuwako kabetsenje matiiti butswa.

³Olwa oheenda omwoyo muno, nolwa oloora amalooro amanji amabi; ne okhuboola amakhuwa amanji kachilanga oboola amakhuwa akobuyingwa.

⁴Kho olwa osuubisia okhukholela Nyasaye eshindu, olashinda okhushikhola ta, okhuba Nyasaye shiasangasibungwa, nomuyingwa tawe. Okhuula wuusie shiosuubisiye eshio.

⁵Nobulayi muno okhulekha okhwitsuba okhushila okhwitsuba mana okhaywe okhuusia eshitsubo tsana.

⁶Shiolafuchililakhwo amakhuwa akoboola nomunwakwo okhukhwinjisia mubwonooni tawe, kho olaboolela omwisaaliisi owa Nyasaye mbu wetsukhana nokaboolile ta. Eshichila okhole Nyasaye okhukhusinyishila nishiina? Eshichila omukhole okhusasia emilimochio nishiina?

⁷Amalooro nikameeta okhuba amanji, obusasishi nende makhuwa amakhaya kameetekhanga, nebutswa iwe okhuula oritsenje Nyasaye.

⁸Shiolesundukha noba nolola abamanani abomushialoshio nibasandibwa kata nibalakholelwa akabakhoyele tawe. Okhuba abobunyali obutiiti okhuula bakhole kabobunyali obukhongo babalachilisia okhukhola.

⁹Ne khulwa okhuba omuruchi nomukhongo wabwe boosi, niye ounyoolanga eshichelo eshikhongo okhurula khubushuru oburungungwa mushialo eshio.[2]

¹⁰Owaheela amapesa shialinyoola akamuhela ta, naye owaheela obuyinda shialiikura kata nabunyoola tawe. Koosi namakhaya butswa.

¹¹Olwa emiandu chimeetekha, nolwa abo abokhuchilia bemeteekha, eshia mwenechio anyoolanga neliira butswa mbu nomuyinda.

¹²Omukholi wemilimo akonanga tsindoolo tsisiro abe niyekure kata nalekure ta, nebutswa omuyinda shiakonanga tsindoolo ta, okhuba ahendelanga obunji bwemianduchie.

¹³Buliho obubi bundi obukhongo obwendolanga mushialo. Omundu yebishilanga obuyinda khulwa okhwikhoonyela olunyuma mana bumusalisia.

¹⁴Akosinjia obuyinda obwo bwosi mumakhuwa akalali neikhabi ta, mana atong'a nalalikhwo neshindu shiokhuleshela abaanabe ta.

¹⁵Shinga olwa omundu arulanga munda ya nyinamwana eshiechenye nolwa khandi alikalukha ario. Shialibukulakhwo eshindu shiosi okhurula khumianduchie echia yakhalabanilanga mushialo muno tawe.

¹⁶Buno khandi nobubi muno, mbu shinga lwomundu yetsa kho nolwa alikalukha butswa ario; neinganga shiina eya anyoolanga mukhukhola emilimo? Ali butswa shinga oulondachililanga omuyeka.

¹⁷Yamenya obulamubwe bwosi mushiilima nende mushibeela; mukhuhenda omwoyo, mukhulwalilila nende mwiruma.

¹⁸Bulano kano niko aka ndaluutsi mbu, eshindu eshilayi khandi shiomundu akhoyile okhukhola nokhulia nende okhunywa nende okhwikhoyela obulayi oburulanga mumilimo chia akhalabananga mushialo muno, khulwa tsinyanga tsindiiti tsia Nyasaye yamuhelesia okhubaho mwoyo, okhuba okwo nikwo omukabokwe.

¹⁹Nyasaye naba nahelesia omundu obuyinda nende emiandu mana namufuchilila okhuchikhoonyela nende okhuchikhoyela, okhuula omundu oyo akhupile Nyasaye orio, nende okhusangalila obulayi obunyoolekhanga okhurula mukhukhalabanakhwe. Okhuba eshio neshihaanwa okhurula khu Nyasaye.

²⁰Khulwa okhuba mbu Nyasaye yamufuchilila okhuba nobusaangaafu, omundu oyo shialahenda omwoyo muno khulwa obulamubwe obuli obwimbichiti tawe.