Read wanga OMWIBAALI 6 Bible Online

OMWIBAALI 6 - wanga bible

OMWIBAALI 6

¹Ndalutsi likhuwa lindi libi muno mushialo, eliikholekhanga khubandu.

²Nyasaye ahelesinjia omundu emiandu, oluyali nende obuyinda, nende buli shindu eshia yakhenya, nebutswa shiamufuchilila okhubikhooyela ta. Habula omundu undi butswa niye oubikhoonyela. Kano koosi namakhaya butswa, khandi akokhutsunia muno.

³Omundu anyala okhuba nabaana eshikhumi khandi ayiindile emiyika eminji, nebutswa kata nayindila emiyika echio chiosi, ne nalasangaalila obuyindabwe ta, noho nalayabilwa obulayi ta; kho emboola mbu omwana owibulwa omuhusa amushila.

⁴Omwana oyo shiyanyoolakhwo inganga yokhwibulwa ta, akhamushilanga mushiilima wa yebililwa.

⁵Omwana oyo shiyamenyakhwo obulamu bwokhushialo noho kata okhumanyilisia shinga olwa buli ta, ne kata kario anyoolanga obuhulushi okhushila omuyinda oyo.

⁶Kata omundu oyo, naba namenya emiyika ebikhumila bibili (2,000), ne nalasangalila obulamu ta, kho ali butswa shinga omwana omuhusa oyo, boosi batsia habundu halala.

⁷Omundu akholanga emilimo khulwa okhunyoola eshiokhulia nebutswa shianyoolanga eshimuhela ta.

⁸Nishiina shiomundu omuchesi ashilila omuyingwa? Ne nobulayi shiina bwomundu omumanani anyoolanga khulwa okhumanya shinga anyala okhwilinda mubulamu?

⁹Ako koosi namakhaya butswa, kali shinga okhulondachilila omuyeka. Nobulayi wikure eshioli ninashio okhushila okhwikomba ebindi

¹⁰Buli shindu eshikholekhanga bulano, shiali nishiarechekhwa khale, ne imelo yomundu yamanyikhana, abulaho ounyala okhuyingana nende omundu oumushila amaani tawe.

¹¹Amakhuwa amanji kabula obukhala, shikamukhoonyanga omundu eshindu shiosi ta.

¹²Niwiina owakhamanya akakhamukasila omundu mubulamubwe obwimbichiti khandi obukhaya butswa obuhwetsangaho shinga eshiinikha? Niwiina ounyala okhuboolela omundu akalikholekha mushialo olunyuma lwokhufwakhwe?