Read wanga OMWIBAALI 7 Bible Online

OMWIBAALI 7 - wanga bible

OMWIBAALI 7

¹Eliira lilayi lishila amafura keshing'ari, khandi inyanga yokhufwa neindayi okhushila inyanga yokhwibulwa.

²Nobulayi muno okhutsia ewa amasika kali okhushila okhutsia ewa lisabo lili. Okhuba okhufwa nikhwo obumalilishi bwabandu boosi; ne abashiliho abalamu okhuula beyitsulisie abeene mbu okhufwa khubalindililanga boosi.

³Eshibeela shishila tsinzekho, okhuba shikhukholanga okhukhunia obweni, nebutswa shikhukholanga okhuchesiha.

⁴Omundu omuchesi ayililisinjia khukokhufwa nebutswa omuyingwa apaaranga khukokhwisangasia.

⁵Nobulayi muno okhuhulila amebaalo kabachesi okhushila okhuhulila tsinyimbo tsiabayingwa.

⁶Okhutsekha khwabayingwa khuli shinga okhurulikha khwa amahwa akebisisia mumulilo. Ako koosi khandi namakhaya butswa.

⁷Omundu omuchesi naba nasandia owashie aba niyekholanga omwene okhuba omuyingwa. Okhubukula eshiomufusi khusasinjia amapaaro komwoyo.

⁸Obumalilishi bwelikhuwa liosi bushila obuchaachilo bwalio, okhwisimilisia khushila okhwichinjimisia.

⁹Shiolabetsanga omwangu wokhusinyikha tawe, shichila obusinyishi bumenyanga mumwoyo kwomuyingwa.

¹⁰Shiolareebakhwo mbu, “Eshichila tsinyanga tsiakhale nitsiba tsindayi okhushila etsia bulano nishiina?” Tawe. Shioreeba orio noba noli omuchesi tawe.

¹¹Obuchesi nobulayi shinga obulaame, ne bukhoonyanga abo abaliho abalamu,

¹²khandi shinga olwa amapesa kakhutetsa okhurula khumasila nolwa obuchesi bukhutetsa burio. Ne obulayi bwobuchesi buli mbu, bulindanga obulamu bwoyo ouli ninabwo.

¹³Yililisiekhwo khumilimo chia Nyasaye. Niwiina owakhanyala okhukololosia eshia Nyasaye yakhola okhushiama?

¹⁴Osangale olwa amakhuwa kaba nikatsiilililanga obulayi ninawe, ne olwa amatinyu ketsa, witsulile butswa mbu; Nyasaye areeranga biosi, obusaangaafu nende amatinyu. Shionyala okhumanyilisia eshitsa okhwikholekha olunyuma tawe.

¹⁵Mubulamu bwanje obukhaya buno, ndalutsi buli shindu; Omundu omulunjishi afwitsanga kata olwa aba nali omulunjishi, naye omumayaanu amenyangaho oluhoono olurambi kata olwa aba nali omumayanu.

¹⁶Kho olaba omulayi muno okhushila tawe. Khandi olaba omuchesi muno tawe. Eshichila wiyiire omwene nishiina?

¹⁷Ne olaba omumayanu muno ta, khandi olaba omuyingwa tawe.

¹⁸Okhuula omanyilisie ako koosi eliambeli nende eliakhabili, niwakhahelesia Nyasaye oluyali oba olanyalilwa mumakhuwa ako koosi.

¹⁹Obuchesi buhelesinjia omundu omuchesi amaani, okhushila kabaruchi ekhumi abali mwitookho.

²⁰Toto mwene abulaho omundu yesi khushialo khuno, oukholanga akobulunjishi ebise biosi ne nalakholakhwo obwonooni ta.

²¹Shiolareka amarwi okhuhulila buli likhuwa liabandu baboola tawe, witsukhana nohulila omukholiwo nakhunyekanga;

²²Nawe omwene omanyile mumwoyo mbu, akhandi akhanji wanyeka abandu bandi.

²³Ndakateema amakhuwa koosi nindikhoonyelanga obuchesi bwanje, mana nindiboolela mbu ndali neshinani shiokhuba omuchesi nebutswa bwali ehale ninasi.

²⁴Omundu yakhamanya arie eshisina shiobulamu? Shiebisa muno khandi neshitinyu muno okhushimanyilisia.

²⁵Nebutswa ndarakhwo eshinani okhumanyilisia, okhurunilisia nende okhukhaaba obuchesi nende eshisina eshiamakhuwa. Khandi ndenya okhumanyilisia obumayanu nende obumayanu bweshiyingwa shinga olwa buli.

²⁶Kano niko aka ndalutsi mbu, omukhasi omumayanu nomubi okhushila okhufwa, ye nomureko, yerusinjia nomwoyokwe kwosi okhukhutila. Nebutswa ouchamisinjia Nyasaye anyala okhwihonokokha khumukhasi oyo. Ne oulamuchamisinjia ta asikha.

²⁷Isie Omwibaali ekhuboolela mbu, kano niko matiiti matiiti, aka ndanyoolile olwa ndabeele nekhabilisinjia amakalusio.

²⁸Ndakhabilisiye amakalusio kandi nebutswa shindakanyoolilekhwo tawe. Ndanyoolile omusaatsa mulala mubasaatsa eshikhumila (1,000) owenyala okhuhelesia oluyali, nebutswa shindanyolilekhwo omukhasi kata mulala tawe.

²⁹Lino nilio elia ndanyoolile mukoosi mbu, Nyasaye yakhulonga okhuba abalunjishi nebutswa abeene khwekhabila tsinjila tsinyinji tsiokhukhushiamia.