Read wanga OMWIBAALI 8 Bible Online

OMWIBAALI 8 - wanga bible

OMWIBAALI 8

¹Niwiina ouli shinga omundu omuchesi? Niwiina oumanyile eshisina shiamakhuwa? Obuchesi bukholanga habweni homundu hasangaala, khandi bukholanga okhukhunia okhwa habweni khukalukhana.

²Isie emboola mbu, ohulilenje amalako komuruchi; nekhulwa okhuba wetsuba eshitsubo imbeli wa Nyasaye, olafwa omwoyo tawe,

³shiolarula bwangu imbeliwe kata olwa amakhuwake kaba nikalakhuchamisiye tawe. Okhuba omuruchi akholanga koosi akamuchamisiye.

⁴Likhuwa liomuruchi neliobunyali, kho niwiina ounyala okhumureeba mbu, “Okholanga orio mbushiina?”

⁵Oyo oulondanga amalako shialanyoola amabi ta, omundu omuchesi amanyilisinjia ebise nende injila yokhukakholelamwo.

⁶Okhuba buli likhuwa lili neshise shialio nende injila yalio yokhwikholeshelamwo, nebutswa omundu ali nomusiko omukhongo okwokhukamanyilisia.

⁷Okhuba shiamanyanga aketsa okhwikholekha ta, khandi abulaho ounyala okhumuboolela.

⁸Abulaho ounyala okhwikalila okhufwa noho okhuyiniaho inyanga yiyie yokhufwa. Ebise bielihe abulaho ounyala okhuhonokokha ta, ne obumayanu shibunyala okhuhonia omumayanu tawe.

⁹Kano koosi ndakalola olwa ndali neyililisinjia khumakhuwa kakholungwa mushialo muno, ewa abandu bandi bali nobunyali, mana basandinjia abashiabwe abali hasi wabwe.

¹⁰Ndalola abandu abamayaanu nibayabilungwa, abenjilanga khandi barula habandu hatakatifu, nibetsoomibungwa mwitookho lia bakholelangamwo obumayanu obwo. Ako koosi khandi namakhaya butswa.

¹¹Eshiina shia amabi nishilakhalakwa bwangu ta, emioyo chiabandu chitsulangamwo amapaaro kokhukhola amabi.

¹²Ne kata omwonooni nakhola amabi okhuula eshikhumi (100), ne natsiililila okhumenya oluhoono, emanyile mbu kaliba amalayi khu abo baritsanga Nyasaye shichila bamuhelesinjia oluyali.

¹³Nebutswa shikaliba amalayi khumumayanu ta, khandi obulamu bubwe bulibira shinga eshinini, shialiyindila mumiyika ta, shichila shiamuhelesinja Nyasaye oluyali tawe.

¹⁴Liliho likhuwa lindi libi elikholekhanga mushialo muno, mbu akhandi akhanji abandu abalunjishi banyoolanga eshinyasio eshikhoyeele okhuhebwa abamayanu, nabo abamayanu banyoolanga amalayi akakhoyeele okhuhebwa abalunjishi. Emboola mbu, kano koosi khandi namakhaya butswa.

¹⁵Kho emboola mbu, nobulayi okhwisangasia mubulamu, shichila shibulaho eshindu shindi eshilayi khumundu mushialo muno nikhulali okhulia, okhunywa nende okhwisangasia tawe. Mana alekhoyanga mumilimochie tsinyanga tsiosi tsiobulamubwe bwa Nyasaye amuhelesia mushialo muno.

¹⁶Olwa ndarakhwo omwoyo okhumanya akobuchesi nende okhulola shinga omundu akhalabananga mushialo muno, nalakonakhwo tsindoolo eshilo neshiteere ta,

¹⁷nolwa ndalola amakhuwa koosi aka Nyasaye yakhola, mbu omundu shianyala okhumanyilisia akekholekhanga mushialo tawe. Kata olwa ateema okhunyakhana nakhabilisia, shianyala okhumanya eshisina shiako tawe. Kata omuchesi naba naboola mbu amanyile, shianyala okhumanyilisia eshisina shiako tawe.