Read wanga OMWIBAALI 9 Bible Online

OMWIBAALI 9 - wanga bible

OMWIBAALI 9

¹Kho ndayililisia khu kano koosi mana nindola mbu, abalunjishi nende abachesi nende akabakholanga koosi kali mumakhono ka Nyasaye, nebutswa omundu shamanyanga nibuba nibuli obuheeli noho isira eshilamwitsila ta. Amakhuwa koosi imbeli wabwe namakhaya.

²Obumalilishi bulala obwo bubetselanga boosi babe abalunjishi noho abamayanu, abalayi noho ababi, abasiiyikhu noho abalali abasiiyikhu ta, abamalanga emisango noho abalamalanga ta. Shinga olwa kali khubandu abalayi nolwa kali khubonooni. Khandi shinga olwa kali khu ababukulanga eshitsubo nolwa kali khu abo abariitsanga okhubukula eshitsubo.

³Lino nelikhuwa libi muno mumakhuwa koosi akekholekhanga mushialo, mbu obumalilishi bulala obwo bubetselanga boosi. Khandi mbu mubulamu bwabwe boosi abandu babetsanga nibetsula nende obwonooni nende amalalu mumioyo chiabwe mana bafwa.

⁴Nebutswa omundu yesi ouli omulamu mushialo ali nobunayi, kata imbwa yinamu yishila italanyi eyifwile.

⁵Okhuba abaliho abalamu bamanyile mbu nibafwe, nebutswa abafu shibamanyile eshindu shiosi tawe, shibanyala okhunyoolakhwo omukabo kwosi tawe, khandi bamala okhwibililwa pe.

⁶Obuheeli bwabwe, isila yabwe, nende eshikhalikhali shiabwe biosi biamala okhuhwa. Shibalisangakhwo khu akekholekhanga mushialo muno tawe.

⁷Lia ebiokhuliabio nosaangaala khandi olie idivaiyo notsaatsahalile omwoyo, shichila Nyasaye yamala okhufuchilila emilimochio.

⁸Buli lwosi wifwalenje ebifwalo ebilayi ebilafu khandi wibashenje amafura khumurwekwo.

⁹Wikhoyelenje mubulamu nomukhayewo owa waheela, tsinyanga tsiosi tsiobulamu obukhaya buno obwa Nyasaye yakhuhelesia mushialo. Okhuba okwo nikwo omukabokwo mubulamu khandi mumilimochio chiosi echia onyakhanilanga mushialo.

¹⁰Eshindu shiosi eshia wenyekha okhukhola, kholanga namaani koosi. Okhuba emakombe wotsitsanga, ebikhole, okhuyililisia, noho okhwekhaka kata obuchesi shibiliyo tawe.

¹¹Khandi ndalutsi likhuwa lindi mushialo muno mbu abelukhanga tsimbilo muno, shibashilanga buli lwosi ta, nabo abalulu shibahulanga buli lwosi lihe tawe; khandi abandu abachesi shibabetsanga nebilibwa buli lwosi ta, nabo abobuchesi shibabetsanga abayinda buli lwosi ta. Abandu abanyala obwimilisi shibanyolanga obwiyangu obwo tawe. Ikhabi yimbi yibakwilaanga abandu boosi.

¹²Shionyala okhumanya eshiseshio shiula tawe. Khwitsukhananga nikhuhambilwe mumatinyu, shinga butswa olwa tsinyeni tsitiilungwa mulukhanda noho amanyonyi olwa kahambungwa mushireko nikalamanyile ta.

¹³Khandi ndalutsi eshilolelo shiobuchesi mushialo muno, ne nishindoleshela okhuba eshilayi muno.

¹⁴Lialiho litookho lindi lituutu muno elialimwo abandu batiiti, mana omuruchi wamaani niyetsa okhuliseera, nalibotokhana mana niyombakha ebininilo ebikhongo khwisisi lialio.

¹⁵Omundu undi yamenyanga mwitookho omwo owali omumanani nebutswa omuchesi muno, owalihonokosia khulwa obuchesibwe. Nebutswa abulaho owetsulilakhwo omumanani oyo olunyuma.

¹⁶Buli lwosi emboolanga mbu obuchesi bushila amaani, nebutswa obuchesi bwomumanani buchayungwa khandi amakhuwake shikarecheresibungwa ta.

¹⁷Nobulayi okhurechelesia amakhuwa komundu omuchesi aboola nomwoyo okwa hasi okhushila okhuyibuukha khwomuruchi mumukhung'ano kwabayingwa.

¹⁸Obuchesi nobulayi okhushila ebimanulwa bielihe, nebutswa omundu omumayaanu mulala yonooninjia amalayi amanji.