Read wanga OLWIMBO OLUKHULUNDU 1 Bible Online

OLWIMBO OLUKHULUNDU 1 - wanga bible

OLWIMBO OLUKHULUNDU 1

¹Luno nolwimbo lwa Solomoni, olulayi muno okhushila tsiosi.

²Unzunzuune nomunwakwo, shichila obuheelibwo nobulayi okhushila idivai.

³Amafurako keshing'ari kali neshiuya eshilayi; Eliiralio nelilayi shinga amafurako keshing'ari, niko akachilanga abakhaana nibakhuheela.

⁴Umbukule khutsie ninawe, khola bwangu khutsie. Obe omuruchi wanje mana unzinjisie mushisikashio. Khulasangaala halala ninawe, khuletsoomia obuheelibwo okhushila idivai. Niko akachila abakhasi boosi nibakhuheela!

⁵Inywe abakhaana ba Yerusalemu, isie endi omumali nebutswa owelikondo lilayi. Endi omumali shinga amaheema komushitsiimi shia Kedari, nebutswa owelikondo lilayi shinga tsipasia tsinzeleleshe tsiomunzu yomuruchi Solomoni.

⁶Mulanjaaya khulwa likondo lianje ta, shichila omubasu nikwo okwangalukhasia omubili. Abasiani befwe basinyishila mana nibachilisia okhukhola emilimo mumukunda kwemitsabibu, shindalikhwo nobwiyangu bwokhwikaasia omwene tawe.

⁷Mboolela iwe omuheelwa wanje, olatsia okhwaya heena amakondiko? Ne kalahulushila heena okhurula khumubasu kweshiteere? Eshichila okhuula ekhukhaabe mubiayo biabaayi bandi nishiina?

⁸Iwe omukhasi welikondo lilayi okhushila abakhasi bandi, noba nolamanyileyo ta, londa amakulu akamakondi, mana waaye ebimemebio ahambi namaheema kabaayi.

⁹Iwe omuheelwa wanje, ekhuchelaasinjia khufarasi isaatsa yelikaari liomuruchi owa Misiri.

¹⁰Liswi lilio nelielikondo lilayi, ne lieleela khwikosilio shinga ebimili.

¹¹Nebutswa khulakhukasilia olunyolo lweitsahabu olwasiaywakhwo nebimili bieifetsa.

¹²Olwa omuruchi wanje yabeele niyekhaale khushitalishie, amafura kanje keshing'ari katuuma eshiunya eshilayi.

¹³Omuheelwa wanje olwa yeyalisinjia khutsimbeele tsianje ahunyanga eshiuya eshilayi shinga eshia manemane.

¹⁴Omuheelwa wanje afwana shinga ebimuli ebiomubulimo ebiamanga ebimuli mumikunda chiemitsabibu chia Engedi.

¹⁵Omuheelwa wanje oli owelikondo lilayi, toto oli owelikondo lilayi muno! Tsimonitsio netsielikondo lilayi shinga tsiamahusi!

¹⁶Lola, omuheelwa wanje oli owelikondo lilayi khandi unjamisinjia muno. Obunyasi obubisi bulaba eshitali shiefwe.

¹⁷Emisiita chilaba emikulo ehieinzu yefwe, nachio emitarakwe chilaba tsisheti.