Read wanga OLWIMBO OLUKHULUNDU 2 Bible Online

OLWIMBO OLUKHULUNDU 2 - wanga bible

OLWIMBO OLUKHULUNDU 2

¹Isie endi eshimuli shia Sharoni, litaanye liomumabanda.

²Shinga litaanye mubisisia nolwa omuheelwa wanje ali mubakhaana bandi.

³Shinga omusaala omulayi kwa machungwa hakari mumisaala chiomumutsuru, nolwa omuheelwa wanje ali hakari mubasiani. Eshinikhashio neshilayi muno okhwikhalamwo. Ne eshiamoshio neshimilamilu muno mumunwa kwanje.

⁴Yandeerire munzuye yelisabo, ne nachinga ipenderaye ikulu eyimanyinjia obuheelibwe khwisie.

⁵Undinyilisie khulwa okhumbelesia emitsabibu emiumu, khandi usakulusie khulwa okhumbelesia amachungwa, okhuba endi omuteshele khulwa obuheeli.

⁶Omukhonokwe omukhasi kuli hasi womurwe kwanje, nakwo omukhonokwe omusaatsa kufumbeelela.

⁷Emulaka inywe abakhaana ba Yerusalemu, mwitsube muliira liebitsusu nende lietsimbongo mbu, shimulayakulakhwo kata okhusakusiakhwo obuheeli ta, okhuula olwa ebise biabwo biene biula.

⁸Embulila omwoyo kwomuheelwa wanje! Lola ngwoyo yetsanga, yelukhanga nasiila ebikulu, yetsanga naruuma mutsingulu.

⁹Omuheelwa wanje ofwana shinga eshitsusu khandi shinga ipuri imbuukha. Lola! Ngwoyo asinjiile ahambi nelisisi. Ahenjelelanga mukari okhubirila mumatirisha, nalolela mumalobelo kalio.

¹⁰Omuheelwa wanje yamboolela ari, Sinjila iwe omuheelwa wanje ounjamisinjia, omuheelwa wanje, yitsa khutsie.

¹¹Lola tsinyanga tsiomunyiri tsihwele, ne ifula yaleshile okhukwa.

¹²Ebimuli bimuliishe buli habundu, nashio eshise shiokhwimba shiulile. Ne omwoyo kwa amahusi kuhulilikhanga mumikunda chiefwe.

¹³Omukhuyu kuchachile okhwama amakhuyu, nachio emitsabibu chimuliishe chihunyanga obulayi. Sinjila witse omuheelwa wanje ounjamisinjia, yitsa khutsie.

¹⁴Iwe lihusi lianje elifisile mumbangatsi tsiomulwanda chama endoolekhwo obwenibwo, chama embulilekhwo omwoyokwo shichila omwoyokwo nokwokhuchamisia nabwo obwenibwo bwakasa muno.

¹⁵Mukhutilile amabwe amatiiti ako akasasinjia emitsabibu chiefwe echimulikhanga.

¹⁶Omuheelwa wanje nowanje, nasi endi owuwe. Yayanga ebiayobie mumataanye,

¹⁷okhuula olwa eshialo bushia, khandi okhuula olwa ebinikha bihwelelela. Kho iwe omuheelwa wanje chelela shinga eshitsusu, shinga ipuri imbukha khubikulu bia Betseri.