Read wanga OLWIMBO OLUKHULUNDU 3 Bible Online

OLWIMBO OLUKHULUNDU 3 - wanga bible

OLWIMBO OLUKHULUNDU 3

¹Eshilo shiosi nindiyalisiye khushitali shianje, ndaloora oyo owandaheela, ndamukhaaba nebutswa shindamunyoola tawe. Ndamulanga nebutswa shiyafuchilila tawe.

²Ndatsia nenjenda chenda mwitookho nembirira mumihanda chialio nende mutsinjila tsialio tsinyelele, ndakhaaba oyo owa ndaheela ndamukhaaba nebutswa shindamunyoola tawe.

³Abalindi abalindanga litookho eshilo bandola olwa bali nibachendanga nibalihenjelesinjia. Nasi nibareeba mbu, “Muluutsikhwo omuheelwa wanje wa ndaheela muno?”

⁴Ne olwa ndababirakhwo hatiiti, ndanyoola omuheelwa wanje wa ndaheela muno. Ndamutila ne shindamulekhula atsie ta, okhuula olwa ndamureera munzu ya mama wanje, mushisika shia ndebulilwamwo.

⁵Emulaka inywe abakhaana ba Yerusalemu mwitsube muliira liebitsusu nende lietsimbongo mbu, shimulayakulakhwo kata okhusakusiakhwo obuheeli ta, okhuula olwa ebise biabwo biene biula.

⁶Nishiina eshitsanga eshio okhurula mushitsiimi, eshifwana shinga omunaara kwomwosi, okweshing'ari eshilayi shiobubane nende manemane, echiakasibwa okhurula khumalesi keshing'ari kabakholi bobukhala bakusinjia.

⁷Lole Solomoni yetsanga nachinjilwe khushifumbishie shioburuchi, abelihe abalulu amakhumi kasasaba, Abaisiraeli bamulindile.

⁸Buli mulala khubo yemanuule olukanga, buli mulala khubo nomulwani omusitsa. Buli mulala yeboyile olukangalwe khushishienje niyerecheeshe okhulwana omusuku ouseera eshilo.

⁹Omuruchi Solomoni yekasilia omwene eshifumbi okhurula khutsimbao tsindayi tsia Lebanoni.

¹⁰Tsisiilo tsiashio tsiakasibwa okhurula khufeetsa, emukongo washio shiali shieitsahabu, ne ahokhwikhala hali nihalwakhwo ingubo yeisambarao eyali niyanabwa obulayi nabakhaana ba Yerusalemu.

¹¹Rule mwitse elwanyi inywe abakhaana ba Zayuni, mulole omuruchi Solomoni. Yefwalile olusimbi lwa nyinamwana yamufwala khunyanga yeshiseleloshie. Khunyangaye ya yali nasangalile muno.