Read wanga OLWIMBO OLUKHULUNDU 4 Bible Online

OLWIMBO OLUKHULUNDU 4 - wanga bible

OLWIMBO OLUKHULUNDU 4

¹Omuheelwa wanje, oli owelikondo lilayi! Toto bwene oli owelikondo lilayi! Tsimonitsio netsielikondo lilayi shinga etsielihusi nitsili mulububilwo. Liswilio lili shinga eshiayo shietsimbusi etsikholomokhanga hasi weshikulu shia Giliadi.

²Ameenoko namalafu shinga amakondi kabechilwe obukoya khandi akosiibwe obulayi. Libulaho kata elala elibulaho tawe, buli elala liiloosiye neliashie obulayi.

³Omunwakwo kufwana shinga inanga iranzayi, ne kuchamisinjia olwa olomaloma. Tsindamatsio tsing'inang'inanga inyuma weshitambayashio shiokhumurwe.

⁴Likosi lilio lifwana shinga omunara kwa Daudi okwombakhwa khulwa okhubikhamwo ebimanulwa, omwa ebikhumba eshikhumila shilala (1,000) biabikhwa, biosi biabalwani abalulu.

⁵Tsimbeele tsitsio tsibili tsifwana shinga ebimeme biebitsusu ebiebulwa amakhwana, ebiayanga mumatanye.

⁶Ndalatong'a khushikulu shia manemane khandi shiobubane, okhuula olwa eshialo bushia khandi okhuula olwa eshilima shihwa.

⁷Omuheelwa wanje, oli owelikondo lilayi khandi wakasa obulayi muno.

⁸Omweha wanje, yitsa khurule ninawe mubikulu bia Lebanoni, khurule ninawe khubikulu bia Lebanoni. Yikha hasi orule khubutenje bweshikulu shia Amana, orule khushikulu shia Seniri nende eshia Herimoni, orule wetsitalanyi nende tsingwe tsiamenya.

⁹Omuheelwa wanje khandi omweha wanje, tsimonitsio nende ebiuma ebili mwikosilio binjamisiiye.

¹⁰Omuheelwa wanje khandi omweha wanje, obuheelibwo nobulayi muno, obuheelibwo nobulayi okhushila idivai. Amafurako keshing'ari kali neshiuya eshilayi okhushila amafura kandi koosi!

¹¹Omuheelwa wanje, omunwakwo kuroonyanga obuushi, olulimilwo luli shinga amabeele nende obuushi khwisie. Tsingubotsio tsili neshing'ari shinga eshia Lebanoni.

¹²Omuheelwa wanje khandi omweha wanje, ofwana shinga omukunda okwebisa khandi shinga isebele eyebisa.

¹³Mumukunda okwo ebirache bineranga. Bikhulanga shinga emisaala echiamakomamanga, echiamanga ebiamo ebilayi muno, shikuchweyanga okhuba nebirakwa ebieshiuya eshilayi tawe,

¹⁴khandi shikuchweyanga okhuba neindesi, noho omutangawisi noho omutalasini tawe. Khandi manemane halala nende amafura koosi keshing'ari kalimwo.

¹⁵Iwe oli shinga isebele eyili mumukunda khandi shinga emichela nende oruchela ebikholomosinjia amaatsi okhurula mubikulu bia Lebanoni.

¹⁶Iwe omuyeka kwemasaba huutsa, nawe omuyeka kwemulambo yitsa, yitse muhutse khumukunda kwanje musalasie eshiuya shieshing'ari shiakwo buli habundu. Lekha omuheelwa wanje yetse mumukundakwe aliekhwo ebiamo biakwo ebilayi.