Read wanga OLWIMBO OLUKHULUNDU 5 Bible Online

OLWIMBO OLUKHULUNDU 5 - wanga bible

OLWIMBO OLUKHULUNDU 5

¹Omuheelwa wanje khandi omweha wanje, emalile okhuula mumukunda kwanje. Ekhung'asia amanemane kanje nende amalesi kanje keshiuya. Endia obuushibwo obumilamilu, enywa idivai yanje nende amabeele kanje. Inywe abaheelwa banje lie khandi munywe, abaheelwa banje, munywe muno.

²Ndali nindiyalisiye nebutswa nelooranga mbu omuheelwa wanje yali nali hamuliango nakhong'ondanga naboola ari, Omuheelwa wanje omweha wanje nzikulila omuliango ndinjile, iwe owa omwoyo kwanje kwaheela khandi lihusi lianje liheelwa; okhuba omurwe kwanje kutorerisibwe nelime, nalio liswi nebiroonyeresi biomunyiri kweshilo.

³Emalile okhufwalula ebifwalo bianje, kho khandi engalushe ebifwale noho? Emalile okhwiyosia ebilenje bianje kho ebifwolafie khandi noho?

⁴Omuheelwa wanje yenjisia omukhonokwe mumuliango, nakwo omwoyo kwanje nikuyia mwisie,

⁵Olwa ndabukha okhwikulila omuheelwa wanje omuliango; amakhono kanje nikafunikhwe nende manemane, natsio tsinzala tsianje nitsiroonya manemane amasalulukhu, khubikalilo biomuliango.

⁶Ndekulila omuheelwa waje omuliango, nebutswa omuheelwa wanje oyo yali namalile okhutsia. Ndekomba muno okhuhulilakhwo omwoyokwe, ndamukhaaba nebutswa nindalamunyoola ta, ndamulanga nebutswa shiyafuchilila tawe.

⁷Abalindi belitookho abeshilo, olwa bali nibachendanga nibalihenjelesia, baanyoola ne nibanywekha nibasalisia, abalindi abo barandula ebifwalo bianje.

⁸Emusaaya inywe abakhasi ba Yerusalemu mbu, nimuba nimwakaanakhwo nomuheelwa wanje mumuboolele mbu emwikomba muno.

⁹Iwe ouli omulayi okhushila abandi boosi, omuheelwawo nomulayi okhushila abandi boosi, welikondo lilayi mubakhasi boosi? Eshiliho eshilayi muno muye eshikhachila ifwe khwakhusuubisia nishiina?

¹⁰Omuheelwa wanje nowelikondo lilayi khandi owamaani, niye yenyene oulolekha mubasaatsa eshikhumila ekhumi (10,000).

¹¹Omurwekwe nomulayi shinga itsahabu inzeleleshe muno, nalio liswilie liekaasia obulayi khandi nilimali ti.

¹²Tsimonitsie netsielikondo lilayi muno shinga tsiamahusi akali hamichela, amahusi akosiibwe mumabeele mana nikasinjila mumuchela.

¹³Tsindamatsie netsindayi shinga omukunda kwetsulamwo tsindesi tsieshing'ari nende manemane. Omunwakwe kufwana shinga amataanye, nikuroonya amafura amanji aka manemane.

¹⁴Amakhonoke nakamaani shinga itsahabu, yefwala ebifwalo ebiobukusi omubilikwe kwarerekha shinga ameeno keinzofu akasiaywakhwo amachina ka isapiri.

¹⁵Ebilenjebie bifwana shinga tsisiilo tsiamachina kobukusi, etsisinjisibwe khubichibi bieitsahabu. Omubilikwe kulolekha obulayi shinga ebikulu bia Lebanoni ebietsulakhwo emisiita.

¹⁶Aboolanga amakhuwa amalayi akokhuchamisia nomulayi muno mumakhuwa koosi, kho inywe abakhasi ba Yerusalemu nolwa ali ario omuheelwa wanje.