Read wanga OLWIMBO OLUKHULUNDU 7 Bible Online

OLWIMBO OLUKHULUNDU 7 - wanga bible

OLWIMBO OLUKHULUNDU 7

¹Iwe oli omukhaana owelikondo lilayi muno, ebilenjebio biakasa mubilaaro. Amarangoko keelonga obulayi shinga ebimili biakasibwa nomusitsa.

²Likhofilio lili shinga eshikaye eshilahwetsangakhwo idivai indayi tawe. Indayo yifwana shinga eshibunjikho shieingano eshiabotokhanwa namataanye.

³Tsimbeeletsio tsibili tsili shinga abaana babili bebitsusu abebulwa amakhwana.

⁴Likosilio lifwana shinga omunaara kwameeno keinzofu. Tsimonitsio tsimwesukhanga shinga amaatsi kamayabo akali mwitookho lia Heshiboni ahambi neshilibwa shia Batsirabimu. Amooluko kachamisinjia shinga omunaara kwa Lebanoni, okwasinjila nikuhenjile Damasiko.

⁵Omurwekwo kwasinjila ikulu shilunji shinga eshikulu shia Karimeli. Liswilio liabaswa ling'inang'inanga shinga ingubo ya sambarau. Obukondo bwayo obulayi bunyala okhung'ang'asia omuruchi.

⁶Iwe omuheelwa wanje, ounjamisinjia! Lolakhwo shinga olwa oli omulayi muno, owokhuchamisia.

⁷Omubilikwo kuchamisinjia shinga omusaala kwamashindu, natsio tsimbeeletsio tsili shinga ebisakanya biakwo.

⁸Ndalaniina omusaala kwamashindu, mana enoche ebiamo biakwo. Khwisie tsimbeeletsio tsili shinga ebisakanya biemitsabibu, omuuyakwo kuli shinga eshiuya shiamachungwa.

⁹Okhutsunzuuna omunwakwo nokhulayi shinga okhunywa idivai indoro, eyikha niyibira khululimi nende khumeeno.

¹⁰Isie endi wa omuheelwa wanje, naye yanzikombanga muno.

¹¹Omuheelwa wanje yitsa khutsie mumukunda, khutsie khwiyalisie eshilo mumataala.

¹²Khuhuune mumabwibwi mumikunda chiemitsabibu, khulole emitsabibu nichiba nichisebuushe, khulole ebimuli biachio nibiba nibibambuushe, noho emikomamanga nichisebuushe. Ebweneyo ndalakhuhelesia obuheeli bwanje.

¹³Onyala okhuhulila eshiuya shietsinduli nende okhuhunya okhulayi okhwebiamo ebili ahambi khumuliango kwefwe. Omuheelwa wanje ekhubishiile ebiamo ebilayi bioluyia lwosi, ebiyia nende ebikhulu.