Read wanga OLWIMBO OLUKHULUNDU 8 Bible Online

OLWIMBO OLUKHULUNDU 8 - wanga bible

OLWIMBO OLUKHULUNDU 8

¹Niwakhabeele omwana wefwe, owanuuna tsimbeele tsiamama, nindakhabukanile ninawe khumuhanda, ndakhakhutsunzuunile ne abulaho owakhateebile eshindu tawe.

²Ndakhakhwimilile nikhureera munzu ya mama, ewa wakhanzechesiye obuheeli; Ndakhakhuhelesiye idivai indayi, nende amaatsi kamakomamanga kanje onywe.

³Omukhonokwo omukaata kube hasi womurwe kwanje, mana ufumbeelele nomukhonokwo omulunji.

⁴Emulaka inywe abakhasi ba Yerusalemu mwitsube mbu, shimulayakulakhwo noho okhusakusiakhwo obuheeli ta, okhuula olwa ebise biabwo biula.

⁵Niwiina outikulukhanga okhurula mushitsiimi, nafumbeeleele omuheelwawe oyo? Embusiiye obwikombibwo noli hasi weshinikha shiomuchungwa aha mamawo yahulilila obutsuunwi nakhwibula.

⁶Khulwa obuheeli umbishenje mumwoyokwo shinga eshibalikho, khandi umbishenje khumukhonokwo shinga eshibalikho. Okhuba obuheeli buli namaani shinga lifwa, nayo imbalikha neyindulu shinga ing'ani. Tsimemu tsiobuheeli tsili shinga tsimemu tsiomulilo omukhongo muno.

⁷Amaatsi amanji shikanyala okhusimia obuheeli tawe, kata emikhula chiamaatsi shichinyala okhubwinikha ta. Ne kata omundu yesi niyakhateema okhukula obuheeli nemianduchie chiosi, yakhanyoola butswa eshifimbwa murwe.

⁸Khuli nomukhaana wefwe omutiiti ne ashili okhurula tsimbeele. Nishiina eshia nakhukholele omukhaana wefwe uno, khunyanga yomusaatsa yetsa okhumuselela?

⁹Niyakhabele lisisi khwakhombashe khuye omunara kweifeetsa, ne niyakhabeele omuliango, khwakhamwikalile netsimbao tsiomusiita.

¹⁰Isie ndali shinga lisisi, natsio tsimbeele tsianje shinga omunara kwalio. Khulweshio omuheelwa wanje achamisibungwa ninasi khandi yehulilanga nali nomulembe.

¹¹Solomoni yali nomukunda kwemitsabibu habundu halangwa mbu Baali Hamoni. Yahosia omukunda okwo khubalimi bandi, buli shiamulala yamuhelesinjia tsifeetsa eshikhumila shilala (1,000).

¹²Omukunda kwanje kwemitsabibu, nokwanje sienyene! Kho iwe Solomoni tong'a neshikhumilashio (1,000) shieifeetsa, ne nabo abalindi batonye nebikhumi bibili shinga omukabo kwabwe.

¹³Iwe omuheelwa wanje, chama embulilekhwo omwoyokwo noli mumukunda, abashianje balindililanga okhuhulila noboola.

¹⁴Iwe omuheelwa wanje, yitsa khwisie bwangu shinga eshitsusu, noho shinga ipuri imbuukha eyayanga khubikulu biamanemane.