Read wanga ISAYA 1 Bible Online

ISAYA 1 - wanga bible

ISAYA 1

¹Eshitabu shino shilimwo oburume khwihanga lia Yuda nende khwitookho lia Yerusalemu, obwa Nyasaye yafwimbulila Isaya omusiani wa Amozi mutsinyanga tsia Yotsamu, Ahazi nende Hezekia abali abaruchi belihanga lia Yuda.

²OMWAMI Nyasaye aboola ari, “Recheresia iwe likulu, reka eshirwi iwe eshialo. Isie ndalela abaana nibakhusia, nebutswa bulano bakhayile okhumbulila.

³Tsing'ombe tsiamanya mwenetsio, kata tsisishili tsiamanya aha omwayi watsio atsiayanga. Nebutswa abandu ba Isiraeli shibamanyile ta, abandu banje babula obumanyilisi.”

⁴Watiba iwe lihanga liobwonooni, inywe abandu obwonooni bwenywe bwamwitsulakhwo, olwibulo lwabakholi bobwonooni. Inywe mwakhaya okhumuhulila OMWAMI Nyasaye, nimufwola Omutakatifu wa Isiraeli, mana nimumufutarila emikongo.

⁵Eshichilanga nimutsiililila okhuukholela induli nishiina? Mwenyanga mumeetwe okhuhebwe eshinyasio shindi eshikhongo noho? Inywe abandu ba Isiraeli, omurwe kwenywe kwitsulekhwo amafumire, omwoyo kwenywe kwosi kufwililiile.

⁶Okhurula khumurwe okhuula khubilenje, habulakhwoho habundu halamu khumubili kwenywe tawe, mwitsulekhwo amafumire, tsinguma nende amakhupache. Ne amakhupache kenywe kashili okhwosibwa kata okhubohwa tawe, kashili okhubakhwakhwo indesi yosi yosi tawe.

⁷Eshialo shienywe shikwile likunda, nako amatookho kenywe kasambilwe nomulilo. Abarende bamunuulanga liloba lienywe nibasasia buli shindu, nenywe nimureerekhwo tsimoni.

⁸Litookho lia Yerusalemu lileshilwe, libotokhaanwe nabasuku, lili butswa shinga akhatsu mumukunda kwemitsabibu, akhalali nomulindi ta, noho shinga liyindu mumukunda kwamahondo.

⁹OMWAMI Nyasaye omwene mahe alabula okhulekhakhwo abandu balala okhuhonokokha, khane Yerusalemu liakhamululilwe elala, shinga olwa Sodomu nende Gomora kamululwa.

¹⁰Inywe abaruchibo ba Sodomu, hulile aka OMWAMI Nyasaye aboola, recheresie aka Nyasaye wefwe amwechesinjia inywe abandu ba Gomora.

¹¹OMWAMI aboola ari, “Muparaanga mbu enzenyanga emisango chia muhaanilanga chino chiosi noho? Endi namakondi amanji, okhushila akamusambilanga ako, endi namasinya akashila akamuhaanilanga ako. Shiesangasibungwa namalasile kenywe aketsisurusi, kata namakondi noho tsimbusi tsienywe tsikhole etsio tawe.

¹²Niwiina awamuboolela mbu, mundererenje ebio biosi olwa mwitsa okhunzinamila? Niwiina owamuboolela okhusenachila mulwanyi lwanje lwa Ihekalu?

¹³Shimulanderera emisango chienywe emikhaya, kata obubane bwenywe obweshisinyo tawe. Shienyala okhufuchilila amasabo kenywe akomwesi omutoro, aka Isabato nende akemikhung'ano chienywe chiokhunzinamila tawe. Koosi kayonoonibwa nobwonooni bwenywe.

¹⁴Amasabo kenywe komwesi omutoro, nende ketsinyanga tsienywe tsindakatifu kaasinyisinjia omwoyo, khandi nomusiko omusiro okunjoonyiye muno.

¹⁵Olwa muchinguula amakhono kenywe ikulu nimusaaya, shinemuhenjekhwo tawe. Kata nimusaaya obutinyu shinerecheresie tawe. Okhuba amakhono kenywe ketsuulekhwo amalasile.

¹⁶Musaabe nimwilafia abeene, murusie obumayanu buno bwosi imbeli wanje. Leshe okhukhola obwonooni.

¹⁷Mweche okhukhola akobulunjishi, mukhole obukhalachi bwahabwene, khandi mukhoonye abo abasandibungwa, mukholele ababisandu akabakhoyele, ne muterere abakhasi abalekhwa.”

¹⁸OMWAMI Nyasaye aboola ari, “Yitse khuloosie amakhuwa kano halala, kata obwonooni bwenywe nibuli obwakhanyu shinga ipala, bulaba obulafu tswe shinga itsaluchi.

¹⁹Nimuba nimumbulila, mulalia ebiamo ebilayi biomushialo.

²⁰Nebutswa nimukhaya okhumbulila, nimukholela induli, muleerwa nolukanga mwihe. Isie OMWAMI emalile okhuboola.”

²¹Lole, litookho eliali lisuubilwa, leelo lili shinga omukhasi omutamba. Litookho eliali nobukhalachi bwahabwene, eliabandu balio balinji abalunjishi, leelo liitsulemwo abeeri.

²²Yerusalemu wali shinga ifeetsa, nebutswa leelo oli shinga ifeetsa yakhupa olukukhu. Wali shinga idivai indayi, leelo oli shinga idivai eyitsushilwemwo amaatsi.

²³Abaruchibo nabeindiri, khandi abeetsa babeefi. Babukulanga ebiomufuusi nende okhwilushila ebihaanwa. Shibatereranga ababisandu mushiina ta; Shibarecheresinjia olwa abakhasi abalekhwa babahabila tawe.

²⁴Khulweshio, OMWAMI Nyasaye, Nyasaye omwene mahe, Nyasaye wa Isiraeli aboola ari, “Omwene ndalemalila eshikwoli khwinywe abasuku banje, ndalanyoola obuhuluushi okhurula khubasuku banje.

²⁵Ndalamuhelesia eshinyasio, ndalamusiiya shinga olwa eshibia shisiiyungwa mumulilo, ndalarusiaho obumayanu bwenywe bwosi.

²⁶Ndalamuhelesia abaruchi nende abachetsiyi shinga aba mwali ninabo khale. Olunyuma lwako, Yerusalemu lilalangwa khandi mbu, litookho liobulunjishi, litookho lisuubilwa.”

²⁷OMWAMI nahonie Yerusalemu, nende abandu balio boosi abeyama obwonooni bwabwe, shichila ye nomulunjishi.

²⁸Nebutswa alamulula boosi abakholanga obwonooni nende abamufukulanga, aleera boosi abamukhupa omukongo.

²⁹Mwakhabeleele abeene mbu mwenamilakhwo emiruba, nende okhuraka emikunda chiahulwa khulwokhwinamila abanyasaye. [1]

³⁰Muliniala shinga olwa omusaala omuruba kunialanga nikufwa, khandi shinga omukunda okulasamungwa amaatsi ta.

³¹Shinga olwa obunyasi busambungwa neshitseso shiomulilo, nolwa abandu bamaani balisasibwa nebikhole biabwe biobumayanu, ne abulaho oulikalila obusasishi bwabwe obwo.